- Puipuia, Tlabung
Cabinet meeting-in Tlabung RD Block siam a remtih tak avanga kan lâwmzia lantir nan, YMA : Tlabung branch-in beihpui thlâka a humhalh lai no-fishing zone huamchhunga sangha manin, kan chief minister leh minister dang lo pêk a ni a. Hemi chungchangah hian thil awmzia hrechiang loa râlkhat a\anga ngaihdan mitdel siam mai a awl dawna a lan avangin, thil awmzia sawi ve hrim hrim ila, a \ha awm e.
1) No-fishing zone-a sangha zawng zawng kan rûtfai lo. Chu chu sawi loh, hmun za a \hena hmun khat (1/100) pawh kan man lo ang.
2) No-fishing zone hian, metre 450 vela sei a awh a, lên zarna hmun hi metre 30 bial pawh a ni kher lo ang.
3) Sangha man tam zawk hi, suat \hen ngai kan tih mai nghaekbak a ni hrim hrim a, tlem azawng man hian sangha dang pun vena tur a puih a beiseiawm hial zawk. Thil \ha lam a ni.
4) Mipui hnenah hlâwkna duh vangin hralh a ni lo. RD Block lawm na’n, tualchhunga a hralh \hinna aia tlâwm daihin zawrh a ni a, mipui leina sum tlingkhâwm pawh no-fishing zone kalpuina atana hman tur, an chaw leina tur, sangha humhalhna tur leh tho a ni. A tâwi zawngin Sangha tan tho a ni!
5) Chief Minister leh kan Minister dangte hi kan tlawn lo. Lâwmthu kan sawi mai zawk a ni. Intlawnna leh lâwmthu sawina chu a dang narawh e.
6) No-fishing zone hmang hian khawsak harsa zawkte hrêk an ni lo, mai ni loin he no-fishing zone avang hian sangha man hi khawsak harsa zawkte tan sum lakluhna hnar \ha takah a chang leh mek zawk a ni. He NFZ hmanga chu’ng mite khâichhuah chu YMA tum a ni zawk.
7) Hun rei tak kan lo humhalh leh vên tawh sangha te hi kan mi pawimawhte ei atan ni khat thil thu-ah kan man rêm duak reng reng lo. Kan man rêm duak emaw titute hian, NFZ huamchhunga sangha tamzia an suangtuah pha loah a ngaih theih hial zawk a, thil lâwmawm lam, Tlabung mipuite \anrual \hatzia lantirtu a ni zawk.
8) NFZ hi mi \hahnemngaiten an hrisêlna thâp takmeuha vengin, beihpui thlâkin an humhalh a, mi tam tak hnâr burh burh laia tlâivara helai \hutchilhtuten phal taka an pe duh ta mai hian, hmasâwnna rahbi thar chuankâi duha Tlabung kan tuihâlzia a lantir nawn leh zawk a ni. Aw Zoram leh a chhunga awmte u, helam hi rawn hawi zel teh u khai.
A tâwp na’n
YMA hi lui dung humhalh turin dânin thu neihna a pe lo, a ni maithei. Mahse, ram a kan duai duai changin, dânin thuneihna a pêkte \helhah chauh dah ila, hmun tam takah thingkung hmuh hi insawi theihna a tling hial tawh ang, tih tur khawpin kan ram a khawro tawh ang.
Lui dung hi dânin humhalh tura thuneihna a pêkte kutah chauh dah ta ila, Mizorama lui zawng zawng tih theih deuhthaw hi a ruak huai tawh ang a, lui luanglai sangha thâng rim hian lung a tilêng \hin ngawt ang chu.