Nigeria-a kar hmasaa rel lun tak beihna thlengah tun thlengin mi 168 vel an chin hriat loh an la nih thu sorkar enkawl rail company chuan a sawi.
Engtiangin nge heng mi 168 velte hi hruai bo an nih theih hriat a ni chiah lo va, \henkhat chu thuneitute hriat lohvin an inah an haw nia rinna pawh a awm bawk.
Silai keng mi sualten an khawpui ber, Abuja leh hmar lama Kaduna khawpui inkar rel kawng chu Thawh\anni khan an bomb chhia a ni.
He thil thlengah hian mi pariat vel an thi nia hriat a ni.
A dam chhuak pakhat chuan an rel chuanna pindan rang taka thlakin amah leh a chhungte nen an him phah niin a sawi.
Coach 17-ah an chuang a, hei hi beih tawk zinga mi niin coach 12-ah an insawn a ni.
“Zan dar 7:45 velah thil puak kan hria a, rel pawh a nghing lawih a, a ding zui ta bawk,” a ti.
Silai a puak zui mawlh mawlh a, a beitute hian an hual nia a hriat thu leh kil tin a\anga an kah thu a sawi.
Thawh\annia beihna thleng hi tun thlengin eng pawl mahin an tihah an la chhal lo.
Kaduna state governor erawh chuan Boko Haram Islamist-ho leh mi ru bo \hinte inthurualte tih a nih ngei a rin thu a sawi a, chhanchhuah hna pawh an thawh mek thu leh tlanna sum erawh pek an tum loh thu a sawi.
Nigerian Railway Corporation chuan beih a nih lai hian relah hian mi 970 an chuang a, mi 168 vel erawh an kim loh thu a sawi a. Chin hriat lohte hi passenger nge thawktu an nih pawh hriat mai a la har niin an sawi.
Reuters news agency chuan chin hriat lohva awm \henkhatte hi mi sual (bandit) nia rinten an chhungte an bia niin a sawi.
Bandit an tihte hi Nigeria hmarthlang lam leh Kaduna state hi an tam zualna a ni a. Tun thla tir pawh khan Kaduna-a thlawhna \umhmun pawh an bei nia sawi a ni.
Thla 24 liam ta chhung khan Nigeria-a ringawt pawh hian hetiang mi sualte hian mi za chuang thatin mi sang telin an chenna in leh lo an chhuahsan phah a ni.