Ruihhlo do turin inzirtirna nasa zawk i nei ang u
Ruihhloin mizo thalaite min run nasa hle a, kum naupang lam thlengin ruihhlo tihbuai an awm zel ta mai. Heti tak maia ruihhlo tihbuai nasat kan ni ta mai hi kan hnam tan hian a la pawi dawn chauh a, tun atanga tihrem dan kawng kan zawn zel hi a la ngai a ni. Hetih lai hian ruihhlo leh a kaihhnawih man tur a la awm reng bawk a, man loh pawh a awm nual ngei dawn tih a chiang reng. Hmalakna neih nasat a va ngai em.
Hetiang hi kan dinhmun a nih chhoh mek laiin Excise & Narcotics department (END) hotute chuan tun hnaiah tleirawlin ganja zuk an intihhmuh nasa hle tih an sawi a. Ganja zu emaw, zuar emaw an mante hi The Narcotic Drugs & Psychotropic Substances Act 1985 tlawhchhana thubuai siamsak tur an ni tiin, a hremna a nat thu an sawi bawk. Hetia ruihhlo leh a kaihhnawih lar ta hluai zel mai hi inzirtirna nasa zawk nei chunga kan do tak tak hi chu a ngai tawh hle a ni.
Tlawmngai pawlten theihtawp chhuahin, END lamin thahnemngai takin thawk thin mah se, ruihhlo do rem hi a har hle mai a, hre zawkte sawi dan phei chuan a kalkawnga awm kan nih vang nia sawite pawh a ni. Mahse, inzirtirna na zawka kan nei lo a nih chuan do hneh mai chi a ni tawh bawk si lo. Sorkar bawk hian ngun leh zau zawkin ngaihtuahna seng se la, zirna in leh mahni inchhung lum atanga ruihhlo that lohzia leh tihchhin pawh a tul lohzia inzirtirna lam hawia ke kan pen nasat hi a va ngai tawh em.