Covid-19 leng vanga Good Friday tum hnih hman mumal theih loh a nih hnuah nimin khan Mizorama kohhranten urshun takin mihringte sualna tlan tura Isua Krista khenbeh a nih champha hi an hmang.
Mizorama kohhran tam zawk chuan Good Friday programme hi Ningani zan atang khan an hmang tan tawh a, Presbyterian Kohhran, Baptist Kohhran leh UPC (NEI) te chuan Ningani zan khan Lalpa Zanriah Sakramen an chang a. Kohhran pawl dangte pawhin Maundy Thursday zanah inkhawm an buatsaih bawk.
Good Friday niah Presbyterian Kohhran chuan chawhma, chawhnu leh zanah inkhawm an nei a, Synod atanga thupui thlan chhuahsa hmangin thuchah an ngaihthla a. Tualchhung kohhran thenkhat chuan chawhma inkhawm banah thingpui ruai an kil ho a ni.
Mizoram Baptist Kohhran, Salvation Army, UPC (NEI) te chuan Good Friday pualin thupui thlan an nei lo a, hun hmangtuten Isua tuarna lam hawi thuchah an sawi a ni.
Tar lan tawh thin angin Covid-19 leng avangin kum 2020 leh 2021-ah Good Friday pualin inkhawm programme mumal buatsaih theih a ni lo a, 2020-ah phei chuan khauh taka inkharkhip kalpui lai a nih avangin Biak Inah hun hman theih a ni lo a, VLTF/LLTF ruahmanna in kohhran puipa mi tlem te-in hun an hmang a, chu hun chu mipuiin an zawm theih nan aurinna hmanga pek chhuah a ni.