Huntawp dawnah Lazio in an si phurh an sut a, Juventus hnehna chang tur chu dal in an player pawimawh pahnihte an mual a an thlah zanah 2-2 in an inhnehtawk.
Allianz Stadium-ah palina ni chiang tawh Juventus in an club captain Giorgio Chiellini leh an forward Paulo Dybala te chhuak tur thlahna inkhel hnuhnungah an beisei ang result nei lo mahse an dinhmun a buai pha lova. Player pahnihte an fans ten an lawm hle.
Juve hian minute 10-naah goal khung nghalin Dusan Vlahovic chuan goal hmahruai a tauh lut a. Minute 18-naah kum 18 chhung Turin a inkhel tawh Chiellini lakchhuah a ni a, mipui hi thawm ring tak nen an lawm.
Minute 36-naah Spain striker Alvaro Morata chuan an goal hnihna a khung. Second half-ah erawh tlahniam in Alex Sandro own goal avangin Lazio an phur thar a. Huntawp dawnah Lazio rinrawl Sergej Milinkovic-Savic chuan an si phurh sutna goal a khung zui bawk.
Coach Massimiliano Allegri chuan mittui nena chhuak Dybala leh Chiellini te fakin, “Zanin chu Chiellini leh Dybala te hun a ni. Chiellini video-te hi training-ah en theih a neih a tha ang, a inpekna leh thawhrimnaah zir tur a tam. Juve ka enkawl tan atanga min puitu a ni.”
“Dybala hi kum sarih chhung player pawimawh a ni a, ka kiangah, kan hnenah a puitling a, a phu ang takin fans ten an thlah hi a ropui.” tiin a sawi.