Honeymoon kan kalnaah min tihlum teuh hle: Amber Heard

Hollywood star Johnny Depp leh a nupui hlui Amber Heart te thubuai a buai chuar chho zel a, nimin khan Court-ah honeymoon an kalnaah a pasal hian a tihlum teuh hle niin, Amber hian a sawi.
A laka intihhmingchhiat thubuai thehluttu Mr Depp lakah kum 36 mi Ms Heard hian a pasal hi ruihhlo ngawlvei, thikthu chhe tak leh mahni intihnat ching a nih thu uar takin a tarlang bawk.
Mr Depp hian a nupui hi chanchinbu pakhata In chhung khura kut thak tuar thin a nih thu a ziah vangin a lakah intihhmingchhiat thubuai siamin, zangnadawmna dollar maktaduai 50 a phut.
A nupui puhna leh sawichhiatna zawng zawng hi a pha vek thung.
Nimin khan kar ngana ni turin an thubuai hi ngaihtuah chhunzawm a ni a, an pahnih hian an thil tawn hrang hrangte Court an hrilh.
Ms Heard chuan Mr Depp (58) hi pasal atan la nei reng ta ang se, a damchhuah a ring lo ni hiala sawiin, “Ka hlauthawng em em a, ka tan tawpna rapthlak tak a thleng ngei dawn nia hriatna ka nei. Kalsan ka duh lo a, ka hmangaih em em si a ni,” a ti.
Ms Heard hian a pasalin kut a thlak fo thu a sawi nawn leh a, February 2015 a honeymoon an kalnaa Orient Express train an chuan laiin a pasal hian na takin a bei a, sleeper compartment-ah a rek bawrh bawrh niin, a sawi.

Leave a Reply

Your email address will not be published. Required fields are marked *

error: Content is protected !!