Aizawl: ZPM party executive committee nimina thukhawmin ZPM Val Upa Council (VUC)-in, “Party-a dinhmun pawimawh chelhtute leh MLA candidate turte ruihtheihthilin a tihbuai loh an ni ngei tur a ni,” a tih chu tha an tih thu sawiin, “Zawm ngei ni se,” an ti.
MNF sorkar meka ram dinhmun thlirin, kawng engkimah a lungawithlak loh nia sawiin, hmasawnna hna thuanawp chhan leh ram inrelbawl kawnga harsatna thlen chhana sorkarin hri leng a chhuanlam pawh chhuanlam tlinga an ngaih loh thu an sawi a. “Hri leng avangin sorkarin mi mal, tlawmngai pawl, kohhran leh central sorkar atangin puihna tha leh sum tam tak a hmu a, chhuanlam tling tur khawpin hrileng khan harsatna a thlen lovah kan ngai,” an ti bawk.
ZPM hruaitute chuan, “Mizoram union territory a nih atanga kum 50 chhungin PC party-in sorkarna term khat leh a chanve an chelh leh president rule-a awm zeuh tih loh chu Congress leh MNF an sorkar chhoh char char avanga ko thlak a hun ve ta nia Zoram mipui ngaihdan hi kan tawmpui,” an ti a. Zoram mipui beiseina tihlawhtlinga kum 2023-a sorkarna siam ngei tura theihtawp an chhuah tur thu an sawi.
Dawrpui Multipurpose Centre (DMC)-a ZPM executive committee thukhawm hian VUC-in kum 2023 MLA inthlan lo awm tura ZPM chief ministerial candidate atana Lalduhoma a puan avanga lawmawm an tih thu an sawi a. Party constitution duan thar chu siam that ngaite siam thaa pawmin, kum 2023 MLA inthlan atana ZPM policy tur an pawm bawk a ni.