Bangladesh-a Chittagong khawpui bul maia kudam lian taka kangmei nasa tak chhuak leh puak zui nasa takah mi 49 vel an thi a, mi dang za chuangin hliam an tuar bawk.
Sitakunda-a kangmei a chhuah hian a thelh tumin mi tam tak an tlan khawm a, lawnga bungraw phurhna bawm lian, container eng emaw zat a puak a ni.
Kangmei chhuah chhan hi hriat mai theih a la ni lo va; mahse, container thenkhatah hian kang duh tak damdawi bawlhhlo (chemical) eng emaw zat a awm nia ngaih a ni.
Bangladesh-ah hian industrial fire tia an sawi ang chi hi a thleng fo thin a, hei hi a himna lam ngaihthah vang a ni hlawm.
Hliam tuar zinga mi thenkhat chu an na hlawm hle a, hei vang hian thi zat pawh hi an pun ngei rin a ni.
A bul hnai damdawi inte chu a khat hneh nghal hle hlawm a, thisen mamawhna a san avangin thisen pe turin mite ngen an ni a. Sipai damdawi inte pawhin hliam tuarte hi an enkawl bawk.
Kangmei hi an ram sanaa Inrinni zan dar 9:00 (India zan dar 8:30) vela chhuak niin kangthelh pawl, police leh mahni thahnemngaihnaa thelh tum tam tak an tlan khawm nghal.
A thelh hna an thawh mek lai hian thil na takin a puak a, a thelhtute chu meiin a tuam hlup a, a keh them leh mihring pawh boruakah a vawrh nasa hle bawk.
“A puah khan ka dinna atanga metre 10 vela hlaah min vawrh sawn dawrh a, ka ke leh ka ban vel a kang a ni,” tiin lorry driver Tofael Ahmed chuan AFP news agency a hrilh.
Kang thelh tuma thawk chhuak pakhat pawhin a hmunah khan mi tam tak an kang niin a sawi bawk.
Tlawmngaia thawk chhuak, silipar nen chauhva che chhuakte chuan ruang senghawi hna thawk chhunzawmin Pathianni tuk thlengin an la buai hle.
Kang thelh zawh hnua thlalak thehdarhah chuan thira siam shipping container pahnih chu a inherh nasa hle a, kudam chung pawh a tlusawp a. Tual chhung chanchinbumi pakhat chuan boruak pawh a rimchhe hle niin a sawi.
Kangthelh pawla mi panga vel thi zingah hian an tel nia hriat a ni a, tam takin hliam an tuar bawk a. Mi thenkhat an chin hriat loh an la awm nual a, an zingah hian chanchinbumi, kangmei a chhuah hlima a hmuna thleng, thil puah hnua chin hriat lohte pawh an awm.
A puak thawm hi kilometre tam tak dan atang pawhin a hriat a, a bul hnaia in darthlalangte chu a tichhe nasa hle a. Dawr nghaktu pakhat chuan a keh them hi kilometre chanve vela hla a in bula a dilah pawh an tla lut nasa niin a sawi a. ‘Van atanga ruah anga fireball lo sur ang mai’ niin a sawi.
Bangladesh-a mi tam tak chuan thil puak hi kum 2020-a Beirut lawngchawlhnaa thil puak nen khan an khaikhin niin BBC chuan a tar lang a. Km 30-40 danah pawh a ri hi an hria niin a tar lang.
Kangthelhtute chuan Pathianni zingah pawh an la thelh mit thei lo va, thil puak a awm leh thin avangin chet chak a harsa niin thuneitute chuan an sawi.
Sipaite chuan sandbag hmangin Indian Ocean-a chemical luang lut tur dan hna an thawk bawk.
Sitakunda-a kudamah hian container 4,000 vel dah a ni a, Bangladesh khawpui lian ber pahnihna leh an lawngchawlhna pui ber, Chittagong atanga km 40 vela hla a ni a. Sitakunda hi lawng hmanga bungraw thawn chhuah tur leh lak luh chhekna ber a ni.
Tual chhung sorkar chuan khawthlang lama thawn tur puanthan dollar maktaduai tel man pawh a awm tih an sawi a. Bangladesh hi thawmhnaw lam thawn chhuak tam ber ram pahnihna an ni.
Mahse, an dahkhawmna hmunah himna dan zam leh zawm a hlawh tawk loh avangin chhiatna lian tak tak an lo tawk tawh thin.