Aizawl: ZPM Leader Lalduhoma chuan party bil sorkar ni lo, mipui sorkar an din dawn avangin a taima leh thar chhuak tam apiangin budget an sawk hnem dawn tih a sawi.
Tuichang bial fang mek, Lalduhoma hian nimin khan Tualte leh Hmunchengah vantlang inkhawm neiin thu a sawi a. Tunlai Mizoram dinhmun thlirin ramin bung thar a kai dawn nia a hriat thu a sawi a. Mizorama sorkarna lo chang tawh party pahnihte thlirin mipui hian kalphung thar a mamawh tawh tih hi mipui ngaihdan leh thlir dan a ni tawh tiin, “Party pahnihte hi an tha lo kan ti lo a, an theih tawkin hna an thawk a ni. Amaherawhchu, an hruaitu lu berten ram leh hnam aia party leh mimal hamthatna an ngaih pawimawh zawk avangin kan ramin a nih tur ang a ni thei ta lo a ni,” a ti.
Lalduhoma hian, “ZPM chuan mithiam rualte nen ngun takin kan zir ho a, a bul atanga a tawp thleng, a chin atanga a hralhna tur hre sa vekin thlai kan ching dawn a ni,” tiin, party bil sorkar ni lo, mipui sorkar an din dawn avangin a taima leh thar chhuak hnem apiangin budget an sawk hnem dawn tih a sawi.
ZPM leader hian chhungkaw tin hian thiam zawng leh tuina an nei vek a; amaherawhchu, bultanna an neih loh avangin eizawnna ngelnghet zawk din an harsat thin tih a sawi a. Mi taima leh remhriate kum nga chhunga chawikan hi an party thil tum pawimawh tak a nih thu a sawi bawk.