- F. Vanlalrochana
SHROEDER-A THIL PHALNA
2005 khan Mi pakhat, a hming Dale Schroeder-a chu a thi a. Thingrem siam a ni a. A hnathawhna hmun pangngaiah kum 67 chhung a thawk a. A taimain a thawk rim em em mai. A in ren a. A thawmhnaw ngai hlir a ha.
A thihdawn khan, a lawyer a ko a. Thurochhiah a siam a. A neih sum zawng zawng chu college kalna nei zo lo, mi retheite tana college kalna senso a dah turin a ti a. Schroeder-a hian a ukil hnenah chuan, “College ka rap ve thei ta lo a. Keimah avangin mi thenkhatten college lo kai ve se ka duh a ni. An tan ka sum zawng zawng hi hman tur a ni” tiin a hrilh.A sum neih zat chu, Us dollar maktaduai thum a ni.
Chhungkhat laina hnai a nei lo a. Nupui a nei lo bawk.
A hnathawh hlawh tlem tlemte te a lo khawl khawm kha nikhua a lo rei chuan a lo pung ve ta viau a. Chumi hmang chuan mi dangte tan malsawmna a ni ta a ni.
Amah avangin mi 33 laiin college an kai phah. USA-ah hian college kai phak hi a awlai lem lo. Schroeder a zar zotute hi damdawi lam doctorte, zirtirtute an ni tawh a. Schroeder-a ngilneihna dawngtu hnuhnung ber chuan, Us dollar nuai 8 dawngin, kuminah Theraphy-ah a graduate a ni.
Mizoramah hian, IAS kan tlem tawh tih leh thil tam tak kan sawi thin. Kan thalaite kan dem a. Kan hnam hmalam hun kan sawi a. Kan khel a, kan ker, kan kheuh neuh a. A tawpah mi tihah kan dah fai leh leng ni te hian a hriat.
Kan hnam tan, mi dangte tan engnge i tih ve dawn? Engnge i tih ve tawh?
MAHNI NGEI CHETCHHUAH
Tunlai Novelist zingah hian Lee Child, David Baldacci, James Patterson, Stephan King te ho thuziak hi ka chhiar tamin ka chhiar nasa a. Lee child-a novel phei hi chu ka nei kimin ka chhiar kim.
An novel lam sawi ka tum lo a. David Baldacci leh James Patterson-a te thilphalna leh mi dangte chawikaina tura an insensona thil hi tawite ka sawi dawn.
David Baldacci hian Wish you well Foundation a din a. America rama ziak leh chhiar thiam loten ziak leh chhiar an thiamna tura hma la tura a din a ni. Retheihna, lehkhathiamlohna leh riltamna inkungkaihna lam hawiah hmalain, chumi ti reh tur chuan a sum a theh chhuak thin a. Wish You Foundation hian hma a la ta thin a ni. A hmalak dan zawng zawng chu sawilo vek lo mai ila.
James Patterson-a hian James Patterson Page Turner Award a siam a. Kum khatah Us dollar 100000 a thehchhuak thin. America rama lehkha an chhiar thatchhe sawt lutuk tihrehna atan leh lehkhabu chhiar an lo tuilehna atan he award hi ti a ni.
ReadKiddoRead.com a siam bawk a. Zirtirtu, nu leh pa leh librarian ten naupang chhiar tur tha an zawnhmuh theina atana ti a ni. Sum tam tak hetah hian a seng bawk.
James Patterson Teacher Education Scholarship leh College Books buck Programme a nei bawk a. Hetah hian a sum tam tak a thehchhuak bawk.
Keini ramah hian vei zawng hrang hrang nei kan awm a. Kan vei zawngte chu kan sawi a, sawi tur pawh a ni reng a. Mi hmalakna atan kan dah fo niin a lang thung.
Baldacci leh Patterson hian an veizawng lam hawiin an inseng so a. Vantlang tan an hun leh tha leh sum an theh chhuak. An hausa a lawm kan ti a ni mai thei, Thingrem siam putar, nitin a thawmhnaw ngai ha thin Dale Schroeder-a khan college zirlai 33 a chawm thei.
US-ah hian zirna a hautak a. Student loan tlingkhawm hi Us dollar 1.4 trillion a ni tawh a. Tuna an president thlanna tura campaign kalchho mekah pawh an au hla pakhat a ni a. Bernie Sanders leh Elizabeth Warren te phei chuan an sawi uar zual.
Mi chuan vei zawng an nei a. An sawi a. A takin an che chhuak a. Kan hnam leh khawtlang kaldan en ila. Vei tur chu a tam. Kan vei hi kan phun ringawt nge, kan hun leh tha, sum leh pai, thiamna leh theihna kan seng ve dawn?
Nge, sum leh pai hlep zawngin kan chhut leh pek dawn?
KAN LAWM E
Jim Reeves-a khan a sa thin a, “We thank Thee each morning for a new born day
Where we may work the fields of new mown hay
We thank Thee for the sunshine and the air that we breathe oh Lord we thank Thee
Thank Thee for the rivers that run all day
Thank Thee for the little birds that sing along the way
Thank Thee for the trees and the deep blue sea oh Lord we thank Thee”…. Zing kan han tho a, boruak thianghlim kara kan han meng leh thei te, engkim kan tih mai hi a nih dan tur emaw kan ti thin! Mihring hi kan thlamuang sual fo. Thi thut thei, he khawvel hi chhuah san thut thei reng kan ni a. Kan kal thei, kan nui thei te hi a lo lawmawm teh e. Pathian khawngaihna ropui tak kan chan lai a, A laka lawm tak a ruanga kan vui thin te hi chu kan ngaihtuahawm a ni.
Engkimah hian Pathian hnena lawmna tur hlir zawk a lo ni. A khawngaihna avanga nunga dam mai kan lo ni si.
Heng zawng zawng te, a bakte pawh hi Seventh Day tlanga Pastor Putar khan a lo hmu chiang em em mai.
” I hnenah lawmthu kan sawi e,
Ei leh in silhfen te nen;
Boruak thianghlim ni eng ruah sur
Malsawmna tinreng te nen”
THE WOMAN WORTH WAITING FOR
Hmeichhe tha, nghah man awm? Chu eng ang mi nge ni ang le. Nula tam tak chuan minute khat vel Lal Isua chanchin sawi a, a bak chu an thawmhnaw design thar te tlai puma sawi nuam an ti zawk thin. Pathian tihmi hmeichhe tha chu eng ang mi nge ni ang le? Mitinin duhzawng bik te chu kann nei vek awm e, chungte chu Lalpa kuta dah mai a tha zawk ang.
Eng pawh nise, tuna a mizia te tha I tih avangin nula chu nupuiah nei ang che, a mizia a la insiam that takin tihlam niloin.
Hmeichhe nghah man awm Quality chu I lo thlir teh ang:
- Amah aia mi dang, Amah mamawh aia midang mamawh dah hmasa chi (Phillipi 2:3-4)
- Lal Isua a lawman nei mi…Lal Isua a neih avanga lawm em em mi (Johana 15:11)
- Tute nen pawh inlaichinna mumal a nei vek. Mi dangte nena inlaichinna tha a nei a, chutianga awm reng chu a tum (Hebrai 12:14)
- Pathian remruat ang zel pawm thiam a, Lalpa hun ruat ang zel nghak thiam mi. (sam 37:7)
- Mi dangte mamawh phuruk tum chi. Mahni indah pawimawh a, puih ngaite pui hmanlo khawpa hun neilo anga indah lo chi (Ephesi 4:32)
- Thudik tan ngam. Pathian duhloh zawng chu haw tlat chi (Rom 2:9-10)
- Pathianin thiamna leh theihna a pek ang zeal Pathian leh mi dangte tana thawh tum chi (1 Korinth 4:2)
- Feelings leh Emotions pawimawhna hrethiam. (Kolossa 3:12)
- Thlemna do hram hram mi. Mi insumthei (Thufingte 25:28)
Pathian tihmi hmeichhia, Pathian rawngbawl tum tlattu nupuia neih theih hi NUna vanneihna sang ber a ni. Nghah a man hla a, a man pek tur pawh nise, a phu vek a ni.
Courtesy: The Right Guy for the Right Girl (becoming the man of her dreams) by Kendall and Jones
SUMHMUN POETRY
Khaw Nge I Awm?
Rûk hmangte’n bûk khuarin
Riangkil tana rothangpui dah sa
Sâwk a, bilh bo a nih lai hian
Khaw nge i awm?
Zalenna râwl rial ang ralin
Dikna phum bo tuma,
Ṭawih ral tura vûr hnan a nih lai hian,
Khaw nge i awm?
Derna thuam chu inbelin,
Parṭhi awrh thlakhlelh vanga
Nun tak hnutiang chhawn a nih lai hian
Khaw nge i awm?
— Davis Hriatpuia