All ArunAchal Pradesh Students’ Union (AAPSU) leh hnam behchhan pawl hrang hrangte chuan Ningani khan Itanagar-a Indira Gandhi Park-ah China-in Upper Subansiri district-a khua an din an duh lohna an lantir.
Zirlai pawl hian China-in India ram chhunga kut an thlak chu an dem hle tih an sawi a, heti chunga sorkar laipui a ngawi tlat chu an hriat thiam loh thu an sawi bawk.
AAPSU president Hawa Bagang chuan sorkar laipui chu ram dang miten a ram chhung an luahna laka humhim zo lovah a puh.
“Sorkar laipuiin a phal a nih phawt chuan AAPSU hi Chinese sipaite do turin kan inpeih reng a ni,” tiin Bagang chuan a sawi.
Bagang-a hian an state atanga MP an neihte pawh he thil chungchangah hian aw chhuah tur leh Arunachal Pradesh leh a mi chengte ngaihven lam ngaihsak turin a ti.
Zirlai pawl hian sorkar laipui chu na taka che chhuak turin an phut tih an sawi bawk.