Liverpool manager Jurgen Klopp chuan an forward Roberto Firmino chu kum khat contract chauh a neih tawh avangin Europe club lian ten ngaihven mahse season thara ruahmanna an neihah a tel tih a sawi.
Klopp chuan, “Bobby hi he team laimu hi a ni a, chuvangin tunah kan training-ah a tel ve pawh hi ka lawm hle. Kan tan player pawimawh a ni a, a theihnaah kan chiang a, sawiselna tur a awm lo.” a ti.
Kum 30 mi Firmino hi season liamta khan Anfield a forward hrang hrang duhthlan tur an neih zingah a tlahniam a. Premier League match 10 chiah bul a tan.
Tunhnaiah Juventus lama insawn tur anga sawi thawm a tam a. An manager hian an tana a pawimawh thu sawi mahse club pahnihte inkara inremna a awm mai theih beiseina Italy lam atangin a la awm.
Klopp-a’n tun nipuia a tlarhma danglam dan a sawi chhunzawm a. Sadio Mane a chhuak chu ui mahse thutlukna a siam vat a, club a hriattir vat chu lawmawm a tih thu a sawi.
“Kum ruk chhunga kan rinrawl Sadio kan chan a, chona thar a duh thu min hrilh hma. Min hrilh hma kha a pawimawh a, kan lo inring hman a, kan tumah kan hlawhtling.” a ti a. A thlaktu atana Darwin Nunez an lalut hman chu a lawm thu a sawi bawk.
Jurgen Klopp hian tun nipui atana squad tihchak erawh thil thar a awm a nih loh chuan an duhtawk tawh thu a lo sawi tawh a, player naupang zawk lam bak an melh tawh lo.