Aizawl : Govt. J. Thankima College Central campus, Bawngkawna Academic building thar, RUSA 2.0 atanga Rs. nuai 160 senga sak chu Higher & Technical Education Minister Dr R. Lalthangliana’n nimin khan a hawng.
H&TE Minister chuan Govt. J. Thankima College chu Mizorama sorkar college zingah management zirna awmchhun a nih thu sawiin, management course sorkarin pawmsak tura an dilna pawh lo ngaihtuah chhunzawm a nih tur thu a sawi a. Kum 30 hmel an hmuh tak avanga a lawmpui thu leh kawng hrang hranga hmasawn tura thawktute tanrualna leh thahnemngaihna ropui a tih thu a sawi.
Dr R Lalthangliana chuan Govt. J. Thankima College-in NAAC assessment tum thumna nei tura an inbuatsaih meknaah duhsakna hlanin, grade tha tak an hmuh theihna tura fimkhur tak leh uluk taka inbuatsaih turin a chah a. Zirlai an pun chak dan a lo hriat thu sawiin, kum 3 chhunga zirlai a leta tam an nei thei pawh "thawktute thawhrimna leh taimakna rah a ni" a ti.
Zirlaite chu an zirtirtute zah thiam tura chahin, tumruhna leh taimakna nen khawvel hmachhawn tur leh a huphurhawm zawnga khawvel thlir lo turin Dr R Lalthangliana chuan a chah bawk.
April 1, 1992 a din Lalhmingthanga College, Durtlang leh Sept 9, 1993-a din J. Thankima College, Bawngkawn chu Mizoram sorkarin chhunfinin J. Thankima College tih a ni zui a, 2002-ah deficit-ah hlankai niin, August 14, 2007-ah Mizoram Univer- sity hnuaiah affiliation an hmu a. Subject 8 zir theihna niin, zirlai 1050 an nei a, Principal leh zirtirtu 40 leh thawktu dang 12 an awm mek a ni.