London khawpuia khawvel huap zirna lama intawhkhawm (global education summit) neih chuan ram rethei zuala naupang maktaduai 88-te hnena zirna pekna tur $ tluklehdingawn nga tal tuak ngah an tum.
UK chuan Global Partnership for Education an tih, ram hrang hrangten ram 92-a naupangten zirna an neih theih nana pawisa an thawh khawmna thinah £ maktaduai 430 pe turin a intiam.
UK leh Kenya ram hnihte huaihawt intawh khawm hian kum nga lo awm leh tur chhunga naupang maktaduai 175-te chhawmdawl dan tur an ngaihtuah.
Ram hruaitu tam takin puihna tur sum pek an intiam hlawm.
UK Prime Minister Boris Johnson chuan, “Khawvel pumah naupang tam tak, a bikin hmeichhiate hi hripui a len hma atang tawh khan sikul an kai thei lo tawh a ni,” a ti.
“An zir thei lo va, an theihna tak tak tilang turin theihna an nei lo va, he an harsatna atang hian kan tal chhuahtir thei a ni,” tiin ram dangte pawh an tana inpe turin a sawm.
Johnson-a hian amah sawiseltu, a telna party-a MP thenkhatte pawh, UK-in ram pawna mi puihna a pe tam lutuk sawiseltute chu a sawisel ve bawk.
Global Partnership for Education hian an tum chu ram rethei zawka zirna kalpui a ni a, hei hian an hriselna, an thanduanna leh dam khaw chhuak tura remchang an neih a siam thei dawn niin an sawi.
Kenya ram cabinet secretary for foreign affairs Raychel Omamo chuan hripuiin hmalakna tithuanawp deuh mah se zirna chu kawng, hma lam panna kawng awm chhun niin a sawi.
Intawh khawm hawngtu, UK Foreign Secretary Dominic Raab chuan hmeichhiate zirna pek chu khawlpui vawn that ang a nih thu sawiin, “Zirna tha nei nu chuan chhungkaw kal zel leh hriselnaah a vawng a ni,” a ti.
“Zirna hi hmeichhe naupangte tana thil thlak thlengna (game-changer) lian ber a ni,” a ti bawk.