Sagar khua, Madhya Pradesh-a mi mal sikula zirlai naupang 39 hnena Covid vaccine pek nana inchiuna pakhat chauh hmangtu chu man a ni ta a, district vaccination officer pawh a hna atanga chawlh lailawktir nghal a ni.
Khawpui chhunga Nilainia vaccine pek rûnpui neihah Jain Higher Secondary School-a zirlaite hnena petu lakah hian FIR ziah luh a ni a, Jitendra Ahirwar-a a ni tih pawh hriat a ni tih district thuneitute chuan an sawi.
Ahirwar-a hi mi mal enkawl nursing college-a zirlai a ni a, health department-in vaccine pe tura tih zingah a train ve tih Sagar district Chief Medical & Health Officer (CMHO) Dr DK Goswami chuan a sawi.
Video darh pakhatah chuan Ahirwar-a hian head of department (HoD)-in a car-in sikulah a dah a, zirlaite chu inchiuna pakhat hmanga chiu vek tura tiin pakhat chauh a pe niin a lang.
“Ka tih dik loh engmah a awm lo,” tiin video-ah hian a sawi nghe nghe.
Ahirwar-a thu sawi hi a dik leh dik loh an zawhnaah CMHO Dr Goswami chuan chhui lai mek a ni a, a mawhphurtu ber, district vaccination officer pawh a hna atanga chawlhtir rih a nih thu a sawi.
Police chuan Ahirwar-a hi Ningani zan khan Sagar-ah hian manin lung inah an dah nghal tih FIR ziah luhna, Gopalganj police station in-charge Kamal Singh Thakur chuan a sawi.
Naupang 39-te hi kum 15 chung lam, pawl kua leh 12 inkarte an ni.
Nu leh pa thenkhat, invenna an laknaa kalpuituten a petu hian inchiuna ngai hlir a hmang hi an hmu fuh a, thuneitute hnenah an thlen atangin he thil hi a darh ta a ni.
Nu leh pate chet dan hriat a nih hnuah Sagar Collector Kshitij Singhal chuan CMHO chu en turin a tir a. Goswami-a’n a endik chuan naupang 39-te hi inchiuna pakhat hmangin vaccine a lo pe ngei tih a hmu ta a ni.
Nu leh paten a tih dan an hmuh chuan Ahirwar-a hi a tlan bo nghal a, CMHO-in sikul a tlawh lai pawhin a awm lo va. A mobile phone pawh a off niin Goswami chuan a sawi.
Sagar Divisional Commissioner Mukesh Shukla chuan Ningani khan District Vaccination Officer Dr Shobharam Roshan chu CMHO-in report a pek bawhzuiin suspend nghal a. A aiawhtu tur pawh ruat nghal a ni.
Gopalganj police station-ah hian Ahirwar-a lakah hian Indian Penal Code (IPC) section 336 (rash or negligent act endangering human life or personal safety of others) hmangin thubuai ziah a ni.