Mizoram pum huapa volleyball champion zaninah an awm dawn a. D3 Amrit Cement 22nd Inter Branch YMA Volleyball Tournament 2022 champion nih inchuhin Khawhai leh Hunthar Veng volleyball team te an inkhel dawn.
Final hi R. Dengthuama Indoor Stadium-ah khelh tur a ni a. Mipa champion ni tura inkhel turte hi tun tournament a team hmuhnawm pahnih, player that zawnga inkhairual tak leh squad chhah tha an ni.
Ningani zan inkhelah Khawhai in semi-final ah thawm nei lian tak Chhinga Veng chu 3-0 in an hneh.
Chhinga Veng hi Pro Volleyball League a khel player kawl nual an ni a, inelna sang boruak tem tawh player tha nei an ni. Mahse an lakah Khawhai an talbuai lo.
Hneh taka set khatna an lak hnuah set hnihnaah pawh an buai lova. Set thumnaah Chhinga Veng tang hle mahse set la leh thovin 25-16, 25-18, 25-22 in an chak.
Inkhel hnuhnungah volleyball thiam veng Hunthar in team hmuhnawm Zawlnuam Vengpui chu 3-0 in an hneh a, mahse inkhel a awlsam lo.
Set hmasa berah point an inhmuhchhawk zak zak a. Team pahnih inthlauhna a tlem.
Set khatna an lak hnuah Hunthar in inrintawkna nen an khel a, set hnihnaah pawh Zawlnuam Vengpui la tang thei viau mahse set an la nawn a. A tawp lamah an khingpuite an zuih a, Hunthar in 28-26, 25-20, 25-13 in hnehna an chang.
Khawhai hian final lut turin Chhinga veng bakah Champhai Tlangsam, Zuangtui, Kawrthah Hmar Veng leh Lunglei Electric Veng te an hneh a. Lehlamah Hunthar hi semi-final hma in Kulikawn West, Kawnpui Chhim Veng, Farkawn leh Vangchhia te an hneh.Hmeichhe final
Zirtawpni zanah hmeichhe final an khel nghal a. Team 39 tel zinga tha ber nih inchuhin team tha tak Bungkawn Branch leh rinkai Kanan hnehtu Kolasib Diakkawn te an inkhel a. Result erawh hriat hman a ni lo.