Bangladesh chuan Myanmar nena an inrina bul, Cox’s Bazar district-a Rohingya raltlante awmna camp bula lei nasa taka min avangin mi 10,000 zet chu hmun himah an suan chhuak.
Fur ruahtui tam tak a tlak avangin Rohingya refugee camp bula lei min vang hian mi 14 vel an thi tawh a, hmun tam takah tui a lian bawk.
Ni thum zet ruah a sur hnuah Nilaini khan lei hi a min ta vak niin refugee commissioner Shah Rezwan Hayat chuan a sawi a. Raltlante hi kum 2017-a sipaiten an hnam an beih vak avanga Myanmar atanga tlanchhiate niin Cox’s Bazar-a tlang ram, Balukhali camp-ah hian an awm.
Kum tin fur hun lai hian an awmna chhehvel ramngawah hian lei a min ziah a, hei vang hian Rohingya sang tel hi awmna tur baihvai takin an awm phah thin.
“Rohingya 10,000 chuang chu ruah leh lei minin a tihbuai avangin hmun him zawkah kan dah sawn,” tiin Hayat chuan AFP news agency hnenah a sawi.
Thi zinga paruk hi Rohingya an ni a, eng emaw zatin hliam an tuar bawk niin thuneitute chuan an sawi a. Thi dangte hi chu khaw mi pangngai, an chenna lei minin a chhilhte an ni.