Namen lova a lar chhoh atang khan Katy Perry hi mental problem-in a bawhbuai. Milar dangte ang bawkin a talbuai viau hman.
Mahse, midang ang lo takin ruihtheih thil lamah a tlan lo a, a buaipui lo. Chu chu tun thleng pawha vannei a intihna leh a lawmna sawisen loh a la ni reng. A ni zel bawk ang.
Kum 37-a upa Katy Perry chuan 2017 kuma tihchhuah ‘Witness’ album in beisei a pha tawk lo leh criitical acclaim a nih phak loh vang khan a beidawng a, depression-in a chenchilh chhunzawm nghal.
A harsatna chingfel tur hian doctor thiamte’n an chawh damdawi chiah a ei a, thil dangah a inham buai lo. Chu chu a hlawkpui hle a, inchhirna tam tak thlen thei tur lakah a him phah.
A nun a chau a, a beidawn vanglai tak tak khan ruihtheih thil leh nungchang hlohna tur lamah a insum a, a inthiarfihlim ngamna khan rahtha a chhuah.
“Ka lawm a ni, ka lawm takzet. Drug addict ka ni lo kha ka lawm hle. Ka nun ka chhui kir a, hun thim leh beidawn ngawih ngawih châng khan a lo tam hle tih ka hai lo. Hun hrehawm leh manganthlak tak tak te khan vawi tam min zim buai a, kal ngaihna hriat loh châng pawh a tam.
“Mahse, rilru sawrbing a, a tha lam chauh thlir a, huaisen taka talchhuah ka tum tlat na khan rilru lama harsatna nasa tak ka neih pawh kha min chhawkin, damna tha tak min siamsak a ni,” tiin Katy hian a sawi.