Aizawl: MNF Vice President Vanlalzawma chuan, “Kan contract hnathawhahte kan danglam bikna hi a lang tur a ni. Party dangte aia kan danglam bikna hi miten an hmu tur a ni,” a ti.
He thu hi Serlui South MNF Block buatsaihin Bilkhawthlir Community Hall-a political training neihah MNF vice president hian a sawi a. Chief minister kaihhruai sorkar hmalaknate miin an hmuhin belh tlakah an ngai a, mi thar duhawm tak tak vawiin thlengin lawm luh tur an la nei zel niin a sawi a. Tlawmna nun nena politics khelh a pawimawh hle a, dawhtheihna leh thuhnuairawlhna nen mi thar sawm luh kawngah thahnem ngai zawkin tha thawh zel turin kalkhawmte a sawm.
Vanlalzawma hian mi thenkhatin social media platform hrang hrangah mipui rilru hruai kawi tumin thuva-uk leh thudik chanve hmangin sorkar leh party beihnate an tidarh thin tih a sawi a. “Hengte hi thu dik zawk nena kan umzui a, mipuite hnena thudik hriattir thin hi kan tih tur a ni,” a ti bawk.
Khualzahawm, Serlui bialtu ni bawk, Lalrinsanga Ralte pawhin thu sawiin, kum thum leh a chanve sorkarna an chan chhungin kum hnih vel zet chu Covid-19 hripuiin tibuaiin, duh angin sorkar hmalakna a kal chak thei lo mah se MNF sorkar hian hnathawhna hun tlem a neih chhunga a hnathawhte hi Congress sorkar kum 10 chhunga an hnathawh nen khan khaikhinin a zahpuiawm vak bik lo tih a sawi.
Rinsanga Ralte chuan SEDP sem a nih theih nan theihtawp an chhuah thu leh, kumin chhung hian a biala SEDP Phase-1 dawng tur thlanchhuahte hian an dawng ngei dawn a, second phase pawh nakumah sem leh tumin ruahmanna kalpui mek a nih thu a sawi bawk.