Lawngtlai district consultative committee, District level review committee leh District level security committee thukhawmin, pawisa thir (coin) hman chungchanga harsatna leh pawisa thir dawng duhlo leh kir tur nei lo dawrkai an awm avanga harsatna sutkian dan tur an sawiho a. Pawisa thir chu sorkarin hman tura a siam a nih thu leh tihtawp tumna a awm loh thu an sawi.
Pawisa thir chu dawn leh hman a hlauhawm lo tih sawiin, dawng duh lo an awm chuan dan anga hrem theih an nih zawk thu an sawi a. Pawisa chu lehkha aia thira siam a hautak loh zawk avangin thir her chhuah a tam deuh deuh thu te, pawisa thir chu pawisa leng vel atana ruahman a nih thu te, pawisa thir hman loh chuan dawr thil leh chawhmeh man bulṭhut (base price) a tihsan phah thu leh pawisa nawi awm loh chhuanlama pawisa nawi aia thil zawrh dang inkir mai emaw, pawisa nawi inkir kim loh emaw te a tihhluar phah thu te, chumiin ṭul lova mipui sum hman ral a tihpun thu te an sawi.
Committee chuan Lawngtlai district mipui, dawrkai leh bank-te chu pawisa thir dawn leh hman tim lo tur leh hnar lo an ngen bawk.