Bhutan ram chhunga Doklam tlang chung zawla Chinee khua chhak lamah Beijing-in hnuhma thar a nei a ni tih thlalem atanga hmuh a nih tuk lawkah Indian Army chief General Manoj Pande chuan ni hnih cham turin Zirtawpni khan Bhutan a thleng a. Doklam leh a chhehvel hi India leh a thenawm ram lian inep meknaa hmuh pawimawh ber tling a ni.
Pande hian Bhutan lal palina, King Jigme Khesar Namgyel Wangchuck leh Jigme Singye Wangchuck te a hmuh dawn bakah Royal Bhutan Army-a an hotupa ber nen an inkawm dawn bawk niin news agency PTI chuan a tar lang.
Sipaiten thuchhuah an siamah chuan, “Tun tuma zin chhuah hi danglam bik leh hunin a la fiah tur inkungkaihna atana pawimawh a ni a, inrintawnna sang tak leh inhriat thiam tawnna sang tak neihna lantirna a ni,” an ti.
Pande-a hian Thimpu-a National Memorial Chorten-ah hun hmang hmasa berin zahna a hlan a, he hmun hi Bhutan lal pathumna, Jigme Dorji Wangchuk hriat reng nana din a ni.
“Chief of Army Staff hian His Majesty the King leh His Majesty the Fourth King a hmu zui ang,” tiin sipai thuchhuahah tar lan a ni.
“Army chief hian Royal Bhutan Army-a hotu lu ber chu thil hrang hrang a sawipui dawn a, nunphung leh eizawnna hmanga ram pahnih sipaiten inkungkaihna tha lehzual an neih theihna turte an dap dawn a ni,” an ti.
July 19 khan Doklam-a China-in hma a lak tharnate pho chhuah a ni a, ministry of external affairs (MEA) chuan heng thilte leh an chetna chu a ngaihvenin a thlithlai reng a, ram himna a tiderthawng dawna ram venhimna lama chet chhuah a tul chuan hma a lak nghal tur thu a sawi.
Pande-a’n Bhutan a tlawh meka a mi kawmte nena an sawiho tur lian ber chu Doklam tlang chung zawla thil thleng mek leh Chinese hmalakna hrang hrangte chu a ni dawn a ni.