Tripura Police chuan Nilainia Agartala-a zirtirtu lungawi lote nena an innawrnaa thil thlengah zirtirtu 12 lakah FIR an ziak lut.
West Agartala Police station-ah thubuai pahnih (No. 19/2021 leh 20/2021) an ziak lut bawk a. Police hian zirtirtute hnenah hian hriattirna erawh an la thawn lo.
Nilaini khan sorkar hna atanga bân zirtirtu 100 chuang chuan Chief Minister Biplab Kumar Deb-a chenna ina luh tumin a kawtah an inhawr khawm a, vengtute nen nasa taka innawrin hliam tuar pawh an awm nual nghe nghe.
He thil thlengah hian mi 200 chuang man an ni.
Police-ten zirtirtu 12-te laka FIR an ziah luhah hian IPC Section 120 (B), 148, 149, 341, 353, 332, 427 leh 188 an bawhchhia tih an tar lang.
Zirtirtu lungawi lot heianga an chet hma hian West Tripura District Magistrate leh collector Shailesh Kumar Yadav chuan mi pun khawm phal loh a nih thu a puang.
Venhim hna thawktute hian chief minister in bul lawka chawlhkar eng emaw zat nawrh huaihawt tawh zirtirtute hi an hnawt darh.
Tar lan tawh thin angin heng zirtirtute hi sorkar hmasa hun laia lak an ni a. Hna thawk tura lak an nih dan a fel tawk loh avangin Supreme Court thu anga bân an ni a. Hna dang neih leh phutin an nawr mek.