Russian defence ministry chuan Ukrainian-ten laipui hmanga inlak hran tumten an awp lai, Donetsk an kahnaah indonaa an man Ukrainian 40 zet an thi tih a sawi.
Thuneitute chuan Olenivka-a rocket hmanga tan in kahnaah hian mi 79-in hliam an tuar bawk niin an sawi.
Ukrainian sipaite erawh chuan he puhna hi an pha a, Russia-in lung in hi a kap zawk niin an sawi a. Moscow chuan he hmun hi an bei ngei a ni tih finfiahna awm theite thup an tum mai niin a sawi bawk.
“Russian awm mekten thubuai an awrh loh nan Ukraine chu indonaa dan bawhchhiaah an puh a, he hmun awptute leh Armed Forces of the Russian Federation thupeka tan ina tangte suatna leh kahna thup an tum a ni,” tiin Ukraine General Staff chuan a sawi.
“Hmelma Russian-te hian an tih dan ngai bawkin Armed Forces of Ukraine chuan civil mite leh an hmunhma leh an tawmna hmunte kapah puhin thu an thehdarh leh ta a ni,” a ti.
Russian sorkar TV-a video tihchhuahah chuan in kang khu vut vut bakah ruangte hmuh theihin a lang a. He in hi eng emaw, laipui pangngai ni chiah lova kah ngei a ni tih a hmuh theih.
Russia-in a thlawp, Donetsk People’s Republic thupuangtu, Daniil Bezsonov chuan mi tangte an awm khawmna kah fuh a nih thu leh thi zat hi an la pung thei tih a sawi.
Russian defence ministry chuan United States siam Himars laipui hmanga kah a nih thu leh he thil hian Ukraine chu uchuak taka a chetzia a tilang tih a sawi.
Ministry thupuangtu, Lt Gen Igor Konashenkov chuan tan ina thawk mi pariat pawhin hliam an tuar niin a sawi.
Hetih lai hian Ukraine President Volodymyr Zelensky-a adviser Mykhailo Podolyak chuan Russian-ten an puhna chu tun hma atang tawha an tih thin, phuahchawp tak a nih thu a sawi a, Ukrainian thuneitute tihhmingchhiat tumna a nih thu a sawi.
“UN leh khawvel huap pual atanga thu chhuah a awm ngei kan phut,” a ti.