Brazil in South America khawmualpuiah hmeichhe football ro an rel chhunzawm a. 1-0 in Colombia hnehin Copa America Femenina title an chawi.
Final inkhelah hian Brazil hian first half a Debinha penalty khung hmangin hnehna an chang a. A zawna Copa America Femenina title hi vawi li an lakna niin an ram chanchin a vawi 8 an champion-na a ni.
Bucaramanga a inkhelah Brazil forward hian minute 39-naah penalty a hmu a. Colombia defender Manuela Vanegas chuan a ti tlu. A penalty hlawhchhuah chu goalkeeper Catalina Perez bumin a khung.
Brazil coach hi Pia Sundhage niin hmeichhe football chanchin a Copa America Femenina title hmeichhe coach in a chawi hmasak ber tum a ni.
Brazil hi tun tournament-ah an chungnung fal a, attacking football hmuhnawm khel thin niin match ruk an khelh atangin goal 20 an khung a, goal khat mah an chhuah lo.
Champion team hian Dollar maktaduai 1.3 prize money-ah an dang a, pahnihna Colombia hian Dolllar 500,000 an dawng ve thung.
Copa America Femenina-ah a sang pathum te hi 2023 World Cup khel turin an tling chiang nghal a. Hei chauh hi ni lovin final khel pahnihte hi kum 2024 Paris Olympics atan an tling nghal.
Khawvel hmeichhe football a ram hlauhawm ni reng thin Brazil hi team hlauhawm la ni reng mahse hun engemaw chen atangin an star player leh rinrawlte an kum a tam tak avangin intuaithar tum an ni a. Tunhnaiah an hnathawh that langin kum 2019 a an lakluh Swedish coach Sundhage hnuaiah hma an sawn nasa zual hle.