Aizawl : Minister of state, Champhai South bialtu T.J. Lalnuntluanga’n Inrinni khan Champhai Tuipui khuaa Boxing hall sak mek chu tlawhin, a enfiah a. Neitu rilru pua tha taka hna thawk tura a beisei thu hnathawktute a hrilh.
Sorkar thuchhuah- in a tarlan danin, Tuipui khuaa Boxing hall sakna atan hian Shyama Prasad Mukherjee Rurban Mission (SPMRM) sum Rs. nuai 40 leh MLA fund Rs. nuai 10 ruahman a ni a. A dung feet 86 leh a vang feet 36 a zauv, a liang san zawng feet 20 ni tura ruahman niin, kumin chhunga zawh hman beisei a ni.
Bialtu MLA, TJ. Lalnuntluanga chuan Mizoram sorkar hmalaknaa Tuipui khuaa Boxing hall changtlung tak tur sak hna tan a ni ta chu lawmawm a tih thu a sawi a. "Mizoram sorkar chuan thalai infiammite hmakhua ngaiin theihtawp a chhuah zel dawn a ni", tiin Tuipuia Boxing hall sak mek chu thalai ten tangkai taka an hman ngei a beisei thu a sawi bawk.