Azl: Law & Judicial Minister T.J. Lalnuntluanga chuan Champhai Tuipui khuaa Boxing Hall sak mek chu Inrinni tuk khan a hmunah tlawhin a enfiah.
Tuipui Hall sak mek hi Shyama Prasad Mukherjee Rurban Mission (SPMRM) leh MLA Fund tangkawp (convergence work) hmanga thawh niin, SPMRM atangin Rs. nuai 40 leh MLA Fund atangin Rs. nuai 10 senga thawh mek a ni a. A dung feet 86 leh a vang feet 36-a zaua sak tum niin, a liang (beam) san zawng hi feet 20 tura ruahman a ni a, kumin chhunga hna hi thawh zawh hman beisei a ni.
Minister chuan Mizoram sorkar hmalaknaa Tuipuia Boxing Hall changtlung tak nei tura hna bul tan a ni ta chu lawmawm a tih thu tar langin Mizoram sorkar chuan thalai infiammite hmakhua ngaiin theihtawp a chhuah zel dawn thu a sawi a. Hall sak mek chu thalaiten tangkai taka an hman ngei a beisei thu sawiin, hnathawktute pawh neitu rilru pua tha taka hna thawk tura a beisei thu a hrilh bawk.
Law & Judicial Minister hi khawtlang hruaituten an tawiawm a ni.