Shiv Sena MP Sanjay Raut chu Pathianni khan Enforcement Directorate-in ram neih dan chungchanga thu zawh fiah tura an kohna vawi hniha a inlan loh hnuah a chenna in dapin an hreng zui.
Sorkar laipui hnuaia thil chhuitute hian chawhma chhung zawng Raut-a in hi an dap a ni.
Zing dar 7:00-ah agency team hi Central Industrial Security Force thuneitute tawiawmna nen Mumbai khawchhak lam dai, Bandup-a Raut-a in hi thlengin a thil neihte an dap a ni.
ED hian kum 60 mi, Raut-a hi Mumbai-a chawl (in lian tak, mi hrang hrangin an luah theih) tuaihnumna leh a nupui leh a lamhnaite inkara pawisa inthawn vela felhlel a awm nia an hriat avangin thu zawh an duh a ni.
Shiv Sena-a Maharashtra chief minister hlui, Uddhav Thackeray-a kaihhruai zawk lama tel, Raut-a hian an puhnaah hian a him tih sawiin tih dik loh engmah a nei lo va, politics-a phuba lakna thil mai a nih thu a sawi.
Hren rih tura an lak mek laiin thuthar lakhawmtute hnenah, “Ka lakah finfiahna phuahchawp siam a ni a, hei hi kei leh Shiv Sena an phiarna a ni a, ka tlawm mai dawn lo,” a ti.
BJP erawh chuan Sena hruaitu hi an koh fo pawha a kal duh loh avangin a bei let a. “Tihsual engmah nei lo si engati nge Enforcement Directorate chu a hlauh em em? Thuthar lakhawmtute kawm turin hun a nei reng a, agency office erawh a tlawh hman tlat si lo,” tiin BJP MLA Ram Kadam chuan a sawi.
Raut-a chenna in tualah Sena worker thahnem tak pungkhawmin ED leh BJP duh lohna an aupui nasa hle.
Rajya Sabha MP hi July 1 khan darkar 10 zet thu zawh fiah a lo ni tawh a, a thil sawite chu Prevention of Money Laundering Act hmanga chhinchhiah vek a ni.
April thla khan ED hian Rs. vaibelchhe 11.15 chuang man, Raut-a nupui, Varsha Raut leh an thawhpui hnai pahnihte hmun chu an lo thlithlai tawh a. Heng hmunte hi Raut-i ta, Dadar-a flat te, Alibaug-a Kihim tuipui kama ram hmun riat, Raut-i leh Raut-a thuihhruai, Sujit Parkar-a nupui, Swapna Patkar-i ta te a ni.