Union Home Minister Amit Shah-a kaihhruai high-level committee chuan Zirtawpni khan nikuma chhimthlang lam atanga fur ruahpui thawk avanga tui lian leh lei min nasa tak puihna atan state panga tan Rs Vbc 1,751 pek chhuah tur a pawm dawng tur zingah hmarchhak state pahnih – Assam leh Arunachal Pradesh a tel.
Ministry of Home Affairs (MHA) chuan Assam, Arunachal Pradesh bakah Odisha, Telangana leh Uttar Pradesh te hnenah heng tanpuina sum hi pek a ni dawn tih thuchhuah a siamah a tar lang.
Committee hian heng state-te tana National Disaster Response Fund (NDRF)-in sorkar laipui atanga tanpuina tur sum pek ni se tia a rawt, Rs 1,751.05 hi a pawm tih a tar lang bawk.
Assam tan hian Rs Vbc 437.15 ruahman niin Arunachal tan Rs Vbc 75.86 ruahman a ni bawk a. Odisha (Rs Vbc 320.94), Telengana (Rs Vbc 245.96) leh Uttar Pradesh (Rs Vbc 386.06) ruahman a ni.
Uttar Pradesh tan bik hian Rabi 2019-20 chhunga rial tla nasa lutuk avanga chhiatna tawkte tan Rs Vbc 285.08 a ruahman bawk.
Tanpuina tur sum pawm a nih thu sawiin home minister chuan Prime Minister Narendra Modi-a kaihhruai sorkar chuan Assam, Arunachal Pradesh, Odisha, Telangana leh Uttar Pradesh-a khualrel chhiatna tawkte chu a hre reng tih a sawi.