Indian Army chuan Pathianni khan an uisathiam, ‘Axel’ tia an koh chu Jammu & Kashmir-a beihpui an thlaknaa a thih hnuah thlahna hnuhnung an hmang.
Axel hi Army-a 29 Rashtriya Rifles-a tel niin Inrinnia beihpui an thlaknaah kah hlum a ni.
News agency ANI-in thlahna hun an buatsaih thlalak a tihchhuahah chuan commando rualin Axel hi zahna hlanin an thlah liam a. Officer-ten a thlanah zahna pangpar an dah bawk.
Axel-a thlanah hian pangpara thu ziak dah tel a ni a. A army number leh a thih ni leh thla leh kum tar lan a ni bawk.
Axel hi Indian Army ui a ni a, Inrinnia Kashmir phaikuama sipaiten mi firfiakte beia beihpui an thlaknaah hruai niin in pakhat an luhchilhnaah a thi a. A ruang an endiknaah chuan hliam hmun 10 chuangah a nei a, a ruh a tliak nual bawk tih a lang.
In an huala an luhchilhnaah hian Army ui dang, ‘Balaji’ an tih pawh tirh a ni a, ani hi thil rim hre thei a ni tel a. “Balaji hnuah hian Axel tirh a ni a, pindan hmasa berah an lut a, tumah an lo awm lo va. Pindan pahnihna an luh leh chuan an lo kap ta a, silaia kah fuh a nih hnuah hian second 15 vel che a la che zui thei a, a thi ta a ni,” tiin sipaite chuan an thuchhuahah an tar lang.
Silai a puah hnuah hian sipaite leh mi firfiakte hi nasa takin an inkap zui a, silai a puah zawh hnuah an endik chuan Axel-a ruang hi an hlam zui ta a ni tih an sawi.