Aizawl: Ram chhung hmun dang ang bawkin July atangin Mizoramah Covid-19 kai an pung chho leh a, ni 30 chhungin hri kai hmuh chhuah mi 3,690 an awm tawh a, thla hmasa aiin 2,920 zetin a tam.
IDSP, Mizoramin an chhinchhiah danin kumin January leh February-a hri kai hmuh chhuah chu 30,000 chung lam ve ve a ni a, March-ah erawh sing bi hnuai lam a ni a, June thla thleng kha a tlahniam zel.
July thla tir atangin ni khata hri kai hmuh an tam leh tan a, ni khata hri kai hmuh chhuah pawh zabi chung lam a ni fo a, za hnih chuang a nih chang pawh a thleng leh ta fo.
July 1 atanga 30 chhunga hri kai hmuh chhuah chu mi 3,690 an tling a, thla kalta June-ah khan thla puma hri kai hmuh chhuah chu 770 a ni a, thla hmasa aiin hmuh chhuah hi 2,920-in a tam zawk a ni.
July 30 khan hri kai thar hmuh chhuah 136 awmin hemi nena hri kai tawh sa belh khawm zat chu 3,690 a tling chho ta a ni.
Inrinnia hri kai mi 136-te hi Rapid Antigen Test hmanga hmuh chhuah an ni a. An zinga mi 47 chu Aizawl district chhunga hmuh niin Lunglei district-ah 25, Mamit district-ah 23, Saitual district-ah 16, Khawzawl district-ah pakua, Lawngtlai district-ah pasarih, Serchhip district-ah pali, Siaha district-ah pathum leh Kolasib district-ah pahnih te a ni.
July 30 thlenga Mizorama hri kai hmuh chhuah tawh zawng zawng chu mi 2,32,738 an tling tawh a, enkawl dam tawh 2,31,060 awmin, nimin tlai dar 5 thleng khan enkawl lai 968 an awm a, thihpui tawh hi 710 an tling tawh a ni.