Indona kal mek vang hian Russia chuan an awp chin, Crimea-a Navy Day an lawmna an kalpui thei bik lo.
Sevastopol Governor Mikhail Razvozhayev chuan Ukrainian-ten drone-a Black Sea Fleet headquarters an kah vang niin a sawi a. Fleet hi hun rei tak Sevastopol-a lo inkulh tawh a ni.
Hetih lai hian Ukrainian thuneitu sang, Serhiy Bratchuk chuan Russian-te thil sawi chu a ni lo tih an sawi.
Russian sipaite hian Crimea hi kum 2014 atang khan an luhchilh tan a. Hei hi khawvel pawhin demin Russia pawh an hrek phah.
Navy Day hi Russian-ten kum tin an lawm thin niin Pathiannia ram puma an lawm tur kha a ni a. President Vladimir Putin chuan a chawr chhuahna, St Petersburg-ah hun a hmang.
Telegram-ah Sevastopol governor chuan ‘eng emaw hriat lohvin Black Sea Fleet headquarters kawtkai a fuh’ niin a sawi a, ‘tuna kan hriat fan chuan drone a ni’ tiin a sawi.
‘Ukronazis’ an tih, Fleet HQ staff paruk an hliam a, thi an awm lo niin a sawi bawk.
Governor Razvozhayev-an headquarters kawtkai a tihlanah chuan thil chhia engmah a lang lo va; mahse, Navy Day lawmna chu venhimna thil avangin an thulh tih a sawi.
Black Sea Fleet zinga mi, Moskva lawng lian chu April thla khan a lo pil tawh a, Ukraine chuan Neptune missile pahnih hmanga kah a ni tih an sawi a. Russian sipai thi leh hliam an awm em tih erawh hriat a ni lo.