Aizawl : Tun thla ni 23 zan atanga a chin hriatloha bo Sadam Lalthangliana, Kawrthah chu ni 7 chhung zawn a nih hnuah hmuh a nih tak loh avangin nimin tlai khan a nawlpuia mi bo zawn hna chu tihtawp a ni.
Kawrthah atanga thudawnnain a sawi danin, kum 31 mi Sadam Lalthangliana hi bengngawng tawngtheilo ni mahse, hnathawh leh thil dangah pawh harsatna nei lem lo, a tul apiang thawk ve bawrh bawrh mai thin a ni a. Tun thla ni 23 zan dar 9 hnu lama a chhuak chu a chin an hre zui ta lo mai a ni.
Tun thla ni 26 zing lam khan Tuidam khaw bul kawng sir tuihawk luankawr, langsar angreng takah a thawmhnawm hmuh a ni a, hei bak hi chu a hnu han chhuidawn tur pawh an hmu ta lo niin thudawnna chuan a sawi bawk.
Taitesena group YMA kaihhruaiin branch hrang hrangin mi bo zawn hna hi an thawk a. Inrinni atang khan Taitesena group YMA huam chhunga branch hrang hrang ten inzawnchhawk lovin an vaiin mi bo zawngin an thawkchhuak a, nimin lam thlengin hmuh a ni lo. Mizo dana ni 7 chhung an zawn tawh avangin nimin tlai khan a nawlpuia mi bo zawn hna chu an titawp ta a, mi bo chhung te nen inrawn tawn chungin a theih ang angin an ngaihven zui dawn tho a ni.