aIZAWL: Siaha district Addl. DC Donny Lalruatsanga hovin Siaha town traffic management committee-in Siaha khawpui chhunga kawngpuite dipdal leh nekchep a nih leh nih loh an enfiah a. Kawngpui nekchep zawnga thil ti te chu August ni 5 aia tlai lova insaseng tura hriattirna thupek an pe nghal.
Nikumah khan Bawrhsap office, SP office, MADC-a a concern deptt. - LAD, Road transport, Revenue & settlement etc te bakah Joint VC leh NGO te tangtlangin Siaha khawpui chhung kawngpuite hi an enfiah tawh a. Tun thlenga thupek zawmlo an awm avangin an enfiah nawn leh ta niin sorkar thuchhuah chuan a tarlang a. Hun tiam chhunga thupek zawmlo te chu dan hmanga hrem an nih tur thu Siaha Addl. DC chuan a sawi.
Siaha town traffic management committee hian insakna leh dawr bungrua, lirthei chhia leh thil dang kawngpui sira dah te, kawngpui neka dawr, workshop step, tuizem, garage luhna tur ramp leh thil dang siam te chu insenghawi turin an hriattir a ni.
Siaha Addl. DC Donny Lalruatsanga chuan "Insakna hmun hma in a zir thlawt loh avanga inthlahrung taka chunga kawngpuia insakna chakkhai indah lailawk te chu an thil dah dan atang pawhin a hriat theih a, hriatthiamna thui tak pawh kan nei ve" a ti a. "Chutiang ni lova, kawngpui hi an ta emaw tia, mipui zahpahna nei lova kan kawngpuite nekchep/dipdaltute hi Siaha khawpui tana mi hnawksak an ni", a ti bawk.