Jharkhand Congress MLA pathum, Bengal-a pawisa tam tak nena Inrinnia hmuhte chu man an ni a, an thubuai hi Crime Investigation Department (CID)-in an chhui zui dawn tih news agency PTI chuan a tar lang.
Heng mite hi Pathianni khan an party chuan an member atangin an chawlhtir lailawk tawh a. A hma lawk erawh chuan an pathum hian BJP-in an sorkar pheh thluk a nih theih nan pawisa hi an pe niin an lo sawi hman.
BJP chuan heng pawisa mante hi Jharkhand Mukti Morcha-Congress tangdun sorkara ei rukna tamzia a lanna niin an sawi.
Congress chuan BJP hian JMM kaihhruai, Jharkhand sorkar hi a tluk theih nan MLA tin hnenah Rs. vaibelchhe 10 pek tiamin an thlem niin a sawi a. Police hnenah Howrah-a man MLA pathumte lakah hian complaint an thehlut bawk.
Thuthar lakhawmtute a kawmnaah Congress minister Alamgir Alam chuan Bermo bialtu MLA Kumar Jaimangal chuan police hnenah MLA pathum lakah hian complaint a thehlut tih a sawi a, MLA dangte pawh Rs. vaibelchhe 10 leh BJP-in sorkar an siam huna minister nihtir an tum hlawm niin a sawi.
“Mi hrang hrang hnen atangin thu kan dawng a. Ni reilo te hnuah he thila inhnamhnawih party office bearer an ni emaw, worker an ni emaw, tu pawh ni se an chungah party-in action a la ang,” tiin Avinash Pande, General Secretary leh in-charge, Jharkhand Congress chuan a lo sawi tawh bawk.
Delhi-a an party headquarters-a thuthar lakhawmtute a kawmnaah Pande chuan Congress president Sonia Gandhi-i-n MLA pathumte hi a chawlhtir nghal tih a sawi.
MLA-te hi Jamtara bialtu Irfan Ansari, Khijri bialtu Rajesh Kachhap leh Kolebira bialtu Naman Bixal Kongari te an ni a. Howrah Rural police-in an pawisa neih dan hi an zawt mek.