- Mahmuaka Chhakchhuak
Mizo Academy of Letters, Joint Hqtr. Lunglei buatsaiha kum 2000 atanga hlan thin PU BUANGA AWARD chu kumin, 2022 hian hlan leh a ni dawn a, a dawngtu tur kan hriat hmain a behbawm ilo sawi hmasa teh ang.
He Award hi mizo thu leh hlaa thawhhlawkte leh mizo tawng hmasawnna tura tha leh zung lo hmang rim tawhtute hnenah hlan a ni thin a, tum khatah mi pakhat hnenah hlan a ni thin. A tir lamah chuan kum nga danah hlan thin a niin kum 2015 atang erawh chuan kum thum danah hlan thin a niin tunah hian mi panga hnenah hlan alo ni tawh a ni. Chungte chu:
Lalsangzuali Sailo
B. Lalthangliana
Prof. Laltluangliana Khiangte
Lalthangfala Sailo
RK. Lalhluna te hi an ni.
Kum 2021 ah khan hlan leh tur a ni nain hripui leng avangin thulh a ni a, kumin, 2022 ah erawh Pathian zarah boruak alo ziaawm tak avangin PU BUANGA AWARD hi hlan theih ngei tum a inbuatsaih mek ni. Tunah hian Top Ten thlan an ni tawh a, remchang hmasa berah Top Five thlan leh a niin, chuta tang chuan Top Three thlan a ni leh anga, chuta tangin Award dawngtu tur chu thlan chhuah tawh tur a ni ang. Tuna Top Ten thlanchhuahte chu;
C. Chhuanvawra
C. Laizawna
C. Lalnunchanga
Darchuailova Renthlei
Dr. Lalzuia Colney
J. Malsawma
Lalrammawia Ngente
Prof. RL. Thanmawia
R. Lalrawna
Rev. H. Killuaia
(An hming hi alphabetical order anga ziah a ni)
Heng Top Ten thlanchhuahte hi mizo ziakmiah an tha ber a, an tling ber e tihna erawh a ni hauh chuang lo a, an ni ang bawka mi tha leh duhawm hi mi tam tak kan la hre ngeiin a rinawm. Nimahsela a thlangtute chuan uluk takin an thlang a, mi tam tak zingah anni hi a awm ber e an tih avangin Top Ten-ah anni hi thlan chhuah an ni. Anni hi mizo thu leh hlaah mi thawhhlawk tak tak an nih mai piah lamah mizo tawng hmasawnna atana tha leh zung lo seng nasa tawhtute nia hriat an ni a, sulhnu ropui leh chhuanawm tak tak an neihte hi thangtharte hian kan hriat sak ngei ngaiin an hria a ni.
Anni zing atanga Top Five thlan chhuah leh pawh hi huphurhawm tak a ni ngeiin a rinawm a, an zavai hian thlan awm tak tak an niin thlang vek thei ila a duhawm laiin pakhat chiah thlan tur a nih bawk si avangin ngaihtuahna hman a ngai hle awm e. An kutchhuak lehkhabute hi hnam ro tling khawpa lehkhabu tha leh hlu a ni a, thenkhatte phei chu Book of the Year atana thlante pawh alo ni hial tawh thin. A mal mala sawi hman ni rih lo mahsela thangtharte hian an kutchhuakte hi kan ngaihhlutsak ngei pawh a tha ngei ang. Zofate zingah anni bak hi an awm kher chuang lo ang a, thu leh hlaa anni aia thawhhlawk hi an tam kher awm lo e. Mizo tawng humhalhna kawngah ngei pawh an hnungzui tura kan inbuatsaih a tha bawk ang.
PU BUANGA AWARD thlangtu Mizo Academy of Letters, Joint Hqtr. Lunglei-te hian ngaihtuahna fim tak leh zau tak hmanga a dawngtu tur hi thlang thin an ni a, tun tuma an thlan turah pawh hian ngaihtuahna nasa tak an hmang ngei bawk ang tih hi ring ngam ila a tha ang. Hun hmasa lama an lo thlan tawh danah pawh sawihnawmna tur engmah ala awm ngai lo a, vawiin thlenga sawiselna tur engmah ala awm loh avang hian tun tumah ngei pawh uluk taka an thlan ngei a rinawm. Top Five thlang chhuak tur hian heng kan ziakmite lehkhabu ziahte ngei pawh hi an chhiar tam a rinawm a, mizo tawng humhalhna kawnga an thawhhlawk dan leh mizo tawng hmasawnna atana an thawkhlawk dante sawi vek tur phei chuan hun pawh a awh rei ngei ang le. Amaherawhchu tupawh hi thlang chhuak mahsela an awm vek thoin a rinawm a, zofate tana mi hlu tak tak vek an nih avang hian chawimawina hlan phu vek an ni.
Kan hriat leh hmuh angin tunlaiin hmun hrang hrangah mizo tawng dik mang loa ziak leh chhiar tur a tam hle a, mizo tawng chu tawng har tak alo nih bawk nen hian ziak dik lo pawh tam tak kan hmu hlawmin a rinawm. Chungahte chuan heng Top Ten an han thlanchhuahte hi chuan mizo tawng an ziak uluk hlawm hlein sawiselna tur a awm meuh lo a, thangtharte hian kan entawn pawh a tha ngei ang. Kan tawng hi a dik thei ang bera kan inhlanchawn zel a ngai a, a dik ber zel kan hman pawh a pawimawh bawk ang. Tawng hi hnam ro a nih mai bakah hnam hmel lanna pawimawh tak a nih bawk avangin kan humhalh that a pawimawh a, tihdanglam tum tute lakah pawh kan ven uluk a pawimawh hle ang. Chutiang a nih avang chuan tuna PU BUANGA AWARD thlan chhuah tura Top Ten-a hming lang phakte hi chu entawn tlak an ni ber chu kan ti thei lo nain entawn tlak tur khawpa mizo tawng ziak danah leh mizo tawng hmasawna tur kawnga mi chhuanawm an niin thangtharte hma hruaitu zinga tel phak an ni.
I lo thlir zel ang le……