Ukraine-a sumdawng hausa ber zinga mi chu a nupui nen Russian-ten nasa taka chhim lama Mykolaiv khawpuiah an kahnaah a thi.
Kum 74 mi, Oleksiy Vadatursky leh a nupui, Raisa hi Inrinni zana missile-in an chenna a fuhah an thi niin Ukrainian chanchinbute chuan an tar lang.
Vadatursky-a hi ei tur thawn chhuaktu, Nibulon neitu a ni a. ‘Hero of Ukraine’ chawimawina pawh a lo dawng tawh.
Mykolaiv Mayor Oleksandr Senkevych chuan Inrinni zana an khawpui kah chu Russian-ten an beih nasat ber tum a nih thu a sawi.
Khualbuk, sports complex, sikul pahnih leh service station bakah chenna in eng emaw zat a chhia niin a sawi.
Mykolaiv hi Ukraine-a an lawngchawlhna lian ber, Odesa panna kawngpuia awm niin a hma pawhin vawi eng emaw zat beih a lo ni tawh.
He lai vela hruaitu pakhat, Vitaliy Kim chuan Vadatursky-a hian Mykolaiv region leh Ukraine tan thil tha tam tak a lo ti tawh thin tih a sawi.
“Lo neih lam leh lawng sakna lama a thawhhlawkna te, helai bial hmasawnna tura a inpeknate hi a hlut zawng chhut chhuah rual a ni lo,” tiin Telegram-ah a tar lang.
Nibulon hian an thil thawn chhuah tur dah thatna hmun tam tak sain ram tan pawh an thawhhlawk hle a ni.
Ukraine leh Russia ramte hi wheat leh ei tur dang, grain an tih ang chi thawn chhuaktu tam ber ram zinga mi an ni ve ve a; an indo hnuah an thawn chhuah hi tawpin khawvel pumah a man a to phah nasa hle.
UN palaina zarah ram pahnihte hian kar hmasa khan Turkey-a ei tur thawn chhuah lamah inremna abn siam a, thil man sang pawh a ziaawm leh tan beisei a ni a; mahse, Ukraine atanga chhuakte hi venhimna lamah endik uluk a ngaih avangin a muang deuh dawn.
Ukraine chuan Russian sipaiten lo atangin grain hi an ru a, Crimea kaltlangin an thawn chhuak niin an puh a. Russia erawh chuan a pha.
Inrinni zan tlai tawh taka Ukraine President Volodymyr Zelensky-a’n thuchah a tihchhuahah khawchhak lam, Donetsk region-a an awp china civil mi chengte chu inthiar chhuak turin a ti.
Heng lai hi Russia-in zau tak a thunun tawh a; mahse, tun hnaiah Ukraine-in bei letin an indona a nasa a, Moscow lam pawhin hma an san chak vak lo.
“Mi tam zawkin Donetsk region an chhuah nghal chuan Russian army-ten mi thahna hun an nei lo a ni mai,” tiin Zelensky chuan a sawi a. “Mi a tam thei ang ber chhan an nih theih nan a tul apiang kan ti ang a, firfiak taka Russian chetna hi a theih chen chen kan dang ang,” a ti.