Khawvel huap milarte hian an private jet hmanga an zin kualna thalak hrang hrang te chu social media-ah an pholang thin a, hei taka hi khawvel sik leh sa tana chhiatna nasa taka thlen thei a nih vangin lawm an hlawh lova, carbon siam chhuaktu lian tak a nih thin vangin a bik takin Taylor Swift, Jay-Z leh Kim Kardasian te chu boruak tibawlhhlawh nasa zualtu a ngaih an ni.
Yard-in zirchianna a neihah chuan ‘climate criminals’ langsar zingah hian carbon emission tamna chhan pakhat, private thlawhna hmang ‘regu’ te tarchhuah niin, Kim Kardashian, Drake, Jay-Z, Taylor Swift, Travis Scott, Oprah Winfrey, Alex Rodriguez leh Mark Wahlberg te an langsar fal.
Zaithiam Taylor Swift hian private jet thlawhna lek lam nasa bera hriat a niin, sik leh sa boruak tihbawlhhlawhna kawnga milar thawhhlawk bera sawi a ni mek, Carbon emission nasa taka thawhchhuahpuitu a puh niin, kumin January 1 atanga July 19 thleng khan private jet hmangin vawi 170 velzet a thlawkchhuak.
Mihringte du hawmna leh inthlahdah vang te mai bakah mahni tanghma hai a, hmasialna chi hrang hrang vangin kan khawvel a chet tual tual a, sik leh sa boruak lum lutuk vangin kan buai ta. Global warming’ nasa tial tialah hian milar te mawhphurhna a sang zual.
Yard hian milarte’n private jet an hman tam dan leh nasat dan uluk takin an zirchiang thin a, data pawimawh tak tak an phochhuah ah hian milarte’n private jet an hman dan, an thlawhchhuah rei zawng te, a thui zawng leh CO2 emission siamchhuah zat te fel fai takin an tarlang a ni.