Kum 2018 leh 2020 inkar khan zirlai naupang, kum 14 leh 18 inkar, an pawl sawnna tur examination-a an hlawhchham avangin 4,000 chuang an intihlum niin sorkar chuan a sawi.
Hetih chhung hian zirlai naupang 24,000 vel an intihlum niin National Crime Records Bureau (NCRB)-in naupang a intihlum a chhinchhiahna, parliament rorel inkhawmah pharh a ni.
Naupang 24,568 an intihlum a, heng zinga 13,325 chu hmeichhia kum 14 leh 18 inkar an ni.
Sorkarin a chhinchhiahnaa a lan dan chuan kum thum chhung hian kum tin naupang intihlum hi an pung a. Kum 2018-ah 8,029 an ni a, 2019-ah 8,162-ah chhovin kum 2020 chuan 8,377 an tling tawh.
Naupang intihlum zat a sang zawnga a kalna hi a tamna ber, Madhya Pradesh bakah West Bengal, Maharashtra leh Tamil Nadu te an ni.
An examination-a an hlawhchham avanga naupang intihlum hi 4,046 chuang an awm a. Nupui pasal neih kaihhnawiha intihlum 639 awmin an zinga 411 hi hmeichhia an ni.
Inngaihzawnna leh hmangaihna lam thila intihlum naupang 3,315 an awm a, damlohna avangin naupang 2,567 an intihlum bawk.
Sorkarin a chhinchhiahnaah hian naupang intihlum 81% hi kutthlak tuar thin an ni.
Kumtlinglote intihhlum chhan langsar dang chu ngaihzawng lak lungrun, zu leh ruihhlova buai, nau pai palh, vantlanga hmuhsit tawh, hna neih loh, retheihna, ngaihdan eng emaw riau neih leh sakhaw thila intihhlum te a ni.