Afghanistan khawchhak lam, Nuristan province-a kar liam ta chhunga tui nasa taka lian avangin mi 113 vel an thi tawh a, mi tam tak chin hriat lohvin an la awm mek.
Pathianni pawh khan chhanchhuah hna thawh mek zel a ni a, kilkhawr taka Kamdesh district chuan tuar na zualin Taliban-in an thunun province a ni a. An khawpui, Kabul atanga hmarchhak km 200 chuanga hla a ni.
Afghanistan National Disaster Management Authority (ANDMA) thupuangtu, Abdul Samai Zarbi chuan chenna in 170 chuang a chhia a, chhungkaw 300 chuangin an tuar niin dpa news agency hnenah a sawi.
Hliam tuar pawh mi 34 an awm thu leh a zat hi la danglam thei a nih thu Zarbi hian a sawi.
Tui lian hian inkalpawhna lei pawimawh tak tak pawh a tichhia a, hei vang hian mamawh zualpui inpekna pawh a buaithlak hle.
“Taliban-in an thunun hnuah hian kan provincial team-te pawh kan tir lut thei lo a ni,” tiin Afghan ministry for disaster management thupuangtu, Tamim Azimi chuan AFP news agency a hrilh.
Afghan Red Crescent Society survey team erawh chu chhiatna thlen dan kimchang en turin an lut thei.
United Nations pawhin district thlen dan ngaihtuahin tui in tur thianghlim pek dan tur pawh an dap mek.