Hun eng emaw chen a reh hnu a album thar, ‘Renaissance’ nena rawn kirleh Beyonce chu he album-a hla thu rilrunatthlak a hman chungchangah nasa taka sawisel a ni.
He album-ah hian taksa harsatna ‘cerebral palsy’ (Taksa balance kalpui thei lo leh ding/thu ngil thei lo) nei te tana ngaihthlak hrehawm leh nuam lo tur hla thu a hmang nual a, ‘Heated’ ah phei chuan a chiang lehzual. Canadian star Drake nena an phuah dun a ni nghe nghe.
Tunhnai mai khan US pop star Lizzo chuan a hla, ‘GRRRLS’ ah he tawngkam bawk hi a lo hmang tawh a, a hnu ah ngaihdam a dil.
Hetih a nih laia Beyonce-i’n a rawn hmang chhunzawm leh hi heti ang lam harsatna nei te tana ding thin advocate Hannah Diviney chuan, “Na taka inben sawkna a ni,” a ti hial.
“Lizzo hnen atanga kan ngaihthlak hnu-ah amah vekin ngaihdam dilin, boruak a tha chho tura ngaih a nih mek laia hmang chhunzawmtu an awm leh hi a vanduaithlak a, heti ang thu sawi fo ngai ta hi mimal tak pawhin chauhthlak ka ti a, rilru a tibuai takzet a ni,” tiin BBC a hrilh.