Union Minister for Development of Northeastern Region (DoNER) G Kishan Reddy chuan Thawhlehni khan New Delhi atangin hmarchhak state pariata chief minister, agriculture minister, chief secretary theuh leh mi pawimawh dangte biain lo neih lama hmasawnna a thlen theih dan tur a sawipui.
Tun tuma union minister-in hmarchhak state hotu lawkte a kawm hi union agriculture ministry-in scheme hrang hrang a kalpuite tihhlawhtlin a nih theihna tur kawng dapna a ni a. Scheme an sawi zingah hian tun hnai lawka tihchhuah, National Mission on Edible Oils, Bamboo Development plan, hmarchhaka horticulture lam tihhmasawn leh organic farming-a ruahmanna neihte tihhlawhtlin dan turte a tel.
Meeting-ah hian agriculture & farmer’s welfare ministry hnuaia budget-a sum dah 10% hmanga lo neitute puih dan tur te pawh sawi lansarh zingah a tel.
Thutkhawmnaah hian Agriculture & Farmers’ Welfare Minister Narendra Singh Tomar pawh a tel a. Tomar chuan hmarchhak chu ram chhunga hna thawh nasat ngai lai a nih thu sawiin prime minister pawhin hma a sawn theihna tur chu a ngaihven reng tih a sawi.
Minister hian agriculture leh DoNER ministry huaihawta hmarchhakte tana lo neih hmanga sumdawnna kalpui dan tura intawh khawm (summit) a nghahhlelhawm thu a sawi bawk.