French champion Paris St-Germain chuan Pathianni zanah Nantes 4-0 in an sawp a. France a tualchhung football season khuhhawnna Trophee des Champions inkhelah hnehna changin bul an tan.
PSG hian manager thar Christophe Galtier hnuaia a vawikhatna atan an khel a. An forward Neymar chuan goal hnih a khung.
Tel Aviv, Israel a inkhelah Mauricio Pochettino thlaktu Galtier hnuaiah PSG an chungnung hle a. A hmalam hun sawi hlawh tak Neymar-a’n goal a khung bakah Lionel Messi-a goal khung tur a siamsak.
Argentina forward in goal hmahruai a khung a, Neymar-a’n free kick a khung hnuah Sergio Ramos chuan an goal thumna a kheng lut a. Jean-Charles Castelletto chuan Neymar ti tlu in penalty a chawi a, Brazilian forward in penalty atangin an goal hnuhnung ber a khung.
Ligue 1 champion hian tunhnaia Trophees des Champions 10 atanga vawi 9 an champion-na a ni a. An khingpui Nantes hi French Cup chawitu an ni.
Inrinni zanah German Super Cup khelh a ni a. League champion Bayern Munich in RB Leipzig chu 5-3 in an hneh a. An forward thar Sadio Mane chuan goal a khung.
German champion tan Jamal Musiala chuan goal hmahruai a khung a. Mane khung hnuah Benjamin Pavard leh Serge Gnabry ten an khung a. Leroy Sane chuan goal a khung ve bawk. Leipzig tan Marcel Halsterberg, Christopher Nkunku leh Dani Olmo ten goal an khung.