Formula 1 world champion ni lai Max Verstappen chuan lallukhum khumtu a nih chhan dik tak a lantir nawn leh a. Hungarian Grand Prix-ah 10-na atanga tlan chhuak tan chungin pakhatna a hauh.
Pathianni zana Hungaroring a intlansiakah hian Verstappen hian hnehna a chang a ni satliah lo, intlansiak laia a car a vir avanga hma a hruaina a hloh zuai hman tawh hnuah a hmasa bera tlan ni leh theiin a tawp thlengin a buai zui lova. Hnaihtu awm lovin intlansiak a tlan zo.
Constructor’s champion ni lai Mercedes pawhin season chawhma lama an harsatna neih chu an kalsan zel tih a lang. An chetthatna tura rin tlankawngah pahnihna leh pathumna hauh lehin Lewis Hamilton leh George Russell ten an dawt.
Hetihlai hian season bul tan tha tak Ferrari an che nawi leh a. Season ropui hmang thei tura beisei an nihlaiin anmahni in an buai tawk leh hle. Pahnihna leh pathumna atanga tlanchhuak tan chungin palina leh parukna chauh an hauh pha. Intlansiak laia thutlukna an siam in sawisel a hlawh lehpek.Driver famkim Max
Kum 24 mi Red Bull Racing chhuanvawr hian Formula 1-ah a season 8-na a hmang mek. Grand Prix racing sang bera a tel tan atangin a thiam avangin fak a hlawh.
A car thunun thiam leh tlanchakna in fak a hlawh a, a huaisen avang leh na taka mi a nawr thinte a larpui rualin sawisel a hlawhna a ni thin. Mahse world champion a nih meuh hnuah erawh sawisel a hlawh thinnate hmuh tur a awm tawh lo.
Hei hi intlanpelh harsatna tlankawng, kual leh kawi ulh tamnaah a lang. Qualifying session hnuhnung berah a car hybrid engine dik lo avangin a tlanchak thei lova, 10-na atang bul a tan.
An tlan tanin a lai lama chep taka innawrnaah a car a veng fimkhur, tawngpawng tlan chak aiin intai buai loh a thlang.
A tir lamah Alpine car pahnih hnungah awmin pariatna nimahsela lap 12 an tlan zawh chuan a hmaah car panga bak an awm lova. A car ke thlak hun a team lamin an tih dik chat chat zel bawk avangin a hma a awm Mercedes te harsatna nei lovin a pelh theih phah. Tyre an thlan dik thin bawk avangin tlanchak tura ngaih ni chunga tyre thlang sual Ferrari pawh a pel a. Harsatna nei lovin hnehna a chang. Verstappen-a intlansiak danin fak a phu.Mercedes tan a lawmawm
Car siam fuh lo Mercedes in season laihawla car ‘upgrade’ thenkhat an hman hnuah hma an sawn. Tlanchak zawngah Ferrari leh Red Bull la pha lo mahse tunhnaia intlansiak hnuhnung pali tlanna kawngte a mam that bakah kual awmdan ten a zir avangin che tha tura ngaih an ni a. An che tha reng bawk.
British Grand Prix leh Austrian Grand Prix-ah Hamilton-a’n dawhsan a luah a, France leh Hungary-ah an driver pahnihte an lawn leh ve ve.
Hungary-ah hian Russell-a’n beisei khumin qualifying-ah pakhatna a hauh a, Hamilton-a DRS chiang lo chuan pasarihna atang bul a tan tir thung.
Intlansiakah an tlan chak rualin an vanneihna a inherchhuak tel. Ferrari team in thutlukna an siam sual hma pawhin car ke thlak leh thildangah thil tih fuh tawk loh an neih an tuar. Mercedes aia tlanchak thei car in Anglo-German team te a tawp lamah an pha lo hle.
Hamilton chuan, “Team dangte keini aiin la tha zawk mahse kan inkar a zim telh telh a, season chawhnu lamah hnaih zawkin kan um theih ka beisei. Hmasawn turin kan thawk chhunzawm zel ang.” tiin beisei a neih san thu a sawi.Buaina ngaiah Ferrari
Ferrari in pakhatna leh pahnihna nih inbeisei takin kartawp bul an tan. Zirtawpni practice-ah an tlanchak fal. Mahse Inrinni ah ruah a sur a, engkim a inthlak danglam. Pathianni-ah ruah sur chiah lo mahse Zirtawpni aia khua a vawh zual avangin an car nungchang a danglam.
Tlankawng daiah car tyre a lum thuai thei lova, car sen in an tawrh phah. A tirah medium tyre hmang a an car pahnihte an tlan tir chu an ti sual dawn lo niin a lang hman. Mahse team dangte thiltih avangin thutlukna an thlak, an car pahnihte ke thlaka an ko luh hma an tuar.
Hei chauh hi a ni lova, intlansiak tawp dawn lamah car ke an thlang fuh lo. An driver Charles Leclerc-a car ah an elpuiten an hman duh loh hard tyre an vuah a. Inrinni ruahsur avanga Zirtawpni aia tlankawng dai daih zawkah hard tyre a lum thei lo. An tihsual chiang taka langin a tawp thleng an rin tir tur tyre hi an thlak nawn leh a ngai hial.