Kum 2015 tawp lam atangin Zoram thalaite incheinaah min rawn run tanin, a hmei apain kan inbel ta fer fur mai a ni. Hawina lam apiangah thalai ten kan uarin kan mawipui viau zel bawk. Dawrkai leh sumdawng te pawhin thalai ten kan ngaina tih hriain design hrang hrang, rawng hrang hrang zia rang nei leh thil in-print awmte min chhawpchhuahsak a, Zoram thalaite kan vannei hle a ni.
A nihna takah chuan khawthlang ramah chuan 2014 atang daih tawh khan thalaiten an lo uar hle tawh a, Zoramah erawh inchei nan taka kan hmanna hi chu ala rei lo hle a ni. He incheina, inthuamna min rûna kan chîn uar mek, Jogger Pants chungchang hi vawiin chu kan tarlang dawn a ni.
A style hrim hrim hi chu kan hmelhriatna rei tawh mah se mi nazawngin kan inbel ngam loh avangin tunhnai atangin tlema inchei huaisen deuh ten an rawn chin chhuah takah chuan a lian a te, a hmei apain kan inbel ta luih luih mai a ni. A thatna riau chu ina han awmpui nawk nawk theih anih rual hian han chhuah pui thut pawh ngai se, kekawr formal deuhte a hranpaa hak kher ngai loin, pheikhawk tha deuh hlek han bun chhuahpui tawp khan a zahpuiawm leh miah si lo a, a tha riau. Chubakah inchei uchuak ngaina lutuk lo tan phei chuan hak nuam bawk si, nalh ve tho bawk si, incheina atana zahpuiawm bawk si lo anihna hi ngainatu a ngah phahna pawh a ni ngei ang.
Zoram thang zelah thalaite pawn incheina ringawt ni lovin kan taksa piante tihmawi a, enkawl kan ching chho tan zel a, chumina a ken tel Gym-a kal thin tam zawkin an work out-na atana an incheina ngainat berte zinga mi anih vangte pawh a ni a nge. Puan hrang hrang – denim, coduorouy leh cotton-ah te design hrang hrang kan hmu chho mek a ni. Exercise lakna atan mai ni tawh lovin incheinaa hak tur design tunlai tak mai te an rawn siam chhuak zel bawk a, kan la uar chho dawn chauh niin a lang.
1997 chhoah chuan khawvel hmun hrang hranga thalaite tlema inla tunlai deuh tan an kekawr tlang baggy lutuk, fual hnelhhnulha an hak thin chu a tlak thlak loh nana an ngalah hreng khawm thinin, tlema rual u deuhte chuan kan hria ang a, kekawr hmawr bilh luh leh pin-a chilh khawm hunlaite kan theihnghilh awm love.
Heng hunlai atang daih tawh hian kekawr tlang arh, a tlang zuih, fual deuh per pur te hunbi neiin kan uar thin a, chutiang chiah chuan kekawr tlang chilh khawm thinna chuan Publish Brand neitupa leh Director ni bawk Michael Huynh-a chu idea pein vawiina kan uar em em Jogger pants hi alo hmuchhuak ta a ni.
A tirah chuan ani pawh hian heti khawp hian a larin an ngaina ang tih a ring bik chuang lo, mahse kekawr tlawn pangngai, a changa arh, a changa zuih danglamna tam em em si lo ringawt ai chuan tlema design danglam deuh siamchhuah duhna neiin Marc Jacobs Sweat Pants, Track pants kan tih ang chi chu siam danglamin vawiina Jogger pants kan tih hi a hmasa ber ni turin an lo siam rem a, a hnuah enchhin nan a dum, a senduk leh a pawl dukah te siam leh chhinin July 2009-ah khan mi tam zawk neih theih turin an lo buatsaih a, a tirah chuan kekawr pair 20 atanga 40 ang vel chauh an hralh chhuak thei a, an bei pawh a dawng hle. Khang hunlai khan an duh lo mai ni lovin mi tam zawk nuih ati za hial a ni. Amaherawhchu, beidawng duh mai bik lovin advertisement leh banner lamah te
Tang lehzualin model leh milarte hmangin he kekawr hi mi tin mil thei tur a nihzia a phochhuak a, vawiin ni hi a thleng ta a ni. A tam zawk chuan hrilh ngai lovin heng kekawrte hi a hakpui leh mil tur kan hre theuh awm e. Chutihrualin thenkhat a la hre lo tan tlema inchei dan tur tips/pic ka rawn chhawp chhuak e.
School kal lai leh College zirlai bikte tan hetianga inchei hi a mawi duh phian. Class kalnaah inchei uchuak duh lo tan tunlai ve tho si, langsar si loa inchei dan tha tak a ni. Office kalte leh chhuah vah, thianho inhmuhkhawm leh chaw eikhawm nikhua atan hei pawh hi a mawi phian. Nula rim nikhua leh party eng iloah te inbel atan a inrem hle bawk a ni. Jacket tel kher lo khian puipun ni leh tlema hunpui deuhah te inbel ila, lang smart khup si loin tunlai tho si hak nuam bawk sia inchei dan tha tak a ni. Jacket erawh chu tlai lam boruak vawt deuh tilum tur atan inbel a pawi lem lo bawk.