United States, California-a ram kang chuan a huam zau zel a, kumina an state-a ram kang lian ber a ni tawh.
McKinney Fire an tih hi Zirtawpni khan Siskiyou county hmar lam atanga intan kha niin ram hectare 21,000-a zau a kang tawh niin fire service chuan a sawi.
Pacific Crest-a cheng leh ram kal mi 2,000 vel chu hmun himah an insaseng tawh a, chenna in tam tak a chhe tawh.
Fire service chuan Thawhtanni tuk khan ram kang hi engmah thelh a la ni lo tih a sawi.
McKinney Fire hi Oregon nena an inrina lai, Klamath National Forest-a kang a ni a. Kangthelhtu 650 rualin khaw lum tak karah a thelh hna an thawk mek niin Los Angeles Times chuan a tar lang.
California-ah hian inralrinna dar khawn a ni a, khua a ro si a, tuna kang bakah pawh hmun dangah ram kang chhuak mai thei a awm nia ngaih a ni.
Siskiyou county-agh hian chenna in leh thil dang a kan chhiat nual hnuah Inrinni khan emergency puan a lo ni tawh tih state governor Gavin Newsom chuan a sawi.
Kangmei hi a inman kai chak em em a, khua a ro va, thil a thaw nasa a, khua a lum em em bawk a, hengte hian a tichak zual tih governor chuan a sawi.
US Forest Service chuan Yreka leh Fort Jones te pawh dinhmun derthawngah a ding mek tih an sawi.
McKinney Fire hi tun hnaia California-a ram kang lian tham an tawrh pahnihna a ni a. Yosemite National Park bul lawka chhuak, Oak Fire an tih chu ni riat zet hnuah pawh a la kang reng a; mahse, 67% vel an thelh tawh niin fire department Cal Fire chuan a sawi a ni.