Myanmar-a rorel mektu sipaite chuan an rama emergency an puan chu kum 2023 thleng an pawt sei leh tih an puang a, nikuma sorkar pai thlaa thuneihna an chan hnuah an ram chhungah buaina a la awm reng vang niin an sawi.
Sipaite hian nikum khan Aung Sung Suu Kyi-i kaihhruaia mipui thlan sorkar chu an paih thla a ni.
Inthlan an buatsaih dawn thu an sawi nghal a, dik leh zalen tak inthlanna a awm tur thu an sawi.
Hetih lai hian Thawhtanni khan an ram dinhmun chu inthlang tur khawpa dinhmun him leh tha a nih nan hun a la ngai niin an sawi a. Emergency puan chhung hian mi man mai theihna a tam zual a ni.
Myanmar-ah hian mi tam tak chuan sipaite hi an duh lo hle a, party hrang hrangin an chuh theih inthlan buatsaih emaw, thlan lal sorkar hnenah emaw thuneihna hlan se an duh.
General Min Aung Hlaing-a kaihhruaia rorel mektute hian nikum August thla khan emergency an lo pawt sei tawh a, prime minister atan a insiam bawk.
Sorkar chanchinbuin an tar lan dan chuan general hian an inthlan dan kalphung chu siam that a tum tih a sawi a. An inthlan dan hmasa hi Suu Kyi-i kaihhruai, National League for Democracy (NLD) party-in kum 2020-a chiang taka inthlana hnehna an chan dan kha a ni.
‘Party thiltithei lutuk; chuan politics-a thawm nei ve turte a dangchat niin a sawi bawk.
Tatmadaw tia an sawi, Myanmar sipaite hian kum 2020 inthlana NLD-in vote tla 83% chuang zet an hmuh khan vote tihchingpenna nasa tak a awm niin an puh.
Hetih lai hian ram dang atanga enpuitute chuan chutiang a awm lo va, zalen leh dik takin an inthlang niin an sawi.
Sipaite hian Suu Kyi-i leh a party-a tel minister eng emaw zat a man a. Suu Kyi-i bik hi rei tak pawn chhuak thei lova an hren hnuah June thla khan tan inah an sawn.
Sipaiten thuneihna an la hi an ram mi tam takin duh lohna lantirin khawlaiah an chhuak khawm a. Sipaite hian silai, tui laipui leh thelret silai nen hmachhawnin an hnawt.
Mihring dikna chanvo humhalhtu pawl pakhat, Assistance Association of Political Prisoners (AAPP) chuan venhim hna thawktute hian mi 2,100 chuang an that tawh niin an sawi a. Sipaite hian politics leh mipui lam atanga anmahni eptu sang tel an man bawk.
Kar hmasa khan sipaite hian mipui rorelna a awm theih nana beitu mi pali an tihlum a, hei hi kum tam tak hnua mi an tihhlum hmasak ber a ni a. An zingah hian democracy campaigner lar, Ko Jimmy leh MP hlui leh hip-hop artist Phyo Zeya Thaw te pawh an tel.
Sipai sorkar hi an khawpui, Naypyidaw pawnah an inkulh ber a, tharum nena anmahni bei lettu, People's Defence Force (PDF) nen an inbei nasa hle.