- Ruata
Royal Enfield chuan an retrostyled bike thar tur, Honda CB350 RS te pian ang leh elpui tur tih theih, Hunter 350cc chu tun thla ni 7 hian tlangzarh an tum a. Report thenkhat chuan he bike hi Royal Enfield lirtheia a man tlawm ber tur a ni dawn niin an sawi a, Rs Nuai 1.5 – 1.7 inkar man tura rin a ni.
He bike chungchanga hriat tur hrang hrang hi company lam chuan official in an la tichhuak chiah lo na a, a hriat theih nual tawh thung a. He bike hi hmun hrang hrangah hmuh theihin a thlalak leh video pawh a darh nasa tawh a, he bike thara kan hmuh tur thenkhat, media report hrang hrangin an lo tarlan tawh te hi tun tumah chuan kan en ho dawn a ni.
Chi hrang leh ken tel
Royal Enfield Hunter hi variant 3 in a awm hmel a, heng te hi – Hunter Retro, Hunter Metro leh Hunter Metro Rebel a ni dawn a ni. Retro bik hi rawng chi hnih – Factory Black & Factory Silver te a awm ang a. Metro variant hi rawng chi 3 – Dapper White, Dapper Ash leh Dapper Grey a awm thung ang a. A man to ber Hunter Metro Rebel hi rawng chi 3 – Rebel Black, Rebel Blue leh Rebel Red te a awm dawn..
A chanchin leak out nia lang atanga kan hmuh danin Hunter Retro variant hian 300mm front disc leh rear drum brake a hmang ang a, single-channel ABS system a nei dawn a. 17-inch spoked wheels, 100/80 leh 120/80 section front and rear tyres te nei dawn a, a rihzawng hi kg 177 a ni dawn a ni.
He variant hian kentel lamah chuan bulb tail lamp, oval shape indicator, handle switch, old classic style instrument cluster leh thil hrang hrang a nei dawn a ni.
A dawt chiah Hunter Metro trim hian 17-inch alloys, 110/70 section leh 140/70 section tyre te, a hma leh hmungah a indawt dan hian a nei ang a. He variant hi kg 181-a rit a ni bawk dawn a, Retro variant aiin kg 4 in a rit zawk dawn a ni.
He variant hian 300mm front disc leh 270mm rear disc a nei ang a, dual-channel ABS (Anti-Lock Braking System) a nei bawk ang. Royal Enfield Hunter Metro hian LED tail-lamp, round shape indicator bakah Meteor-a kan hmuh ang switch gear leh instrument cluster te a nei dawn a ni.
RE Hunter seat hi mm 800 a sâng a ni ang a, a ground clearance hi mm 150 a ni bawk a. A fuel tank-ah hian petrol litre 13 a leng dawn bawk a ni.
A khawl leh thildang
RE Hunter 350 lo chhuak tur hi Meteor te a kan hmuh ang, double cradle chassis nghahchhana duan tur a ni a. A frame mai bakah hian Hunter hian a part leh a khawlah Meteor a tawm nual dawn a ni. A khawl lamah chuan Meteor leh Classic tharah te pawh kan hmuh ang, 349cc, single-cylinder engine 20.2bhp power leh 27Nm torque pechhuak thei a rawn hmang ve dawn a ni.
Tuna thlalak darh meka a lan danin Royal Enfield Hunter 350 hian Royal Enfield bike dang aia swing arm tawi leh te zawk a nei ang a, a fuel tank design pawh a danglam daih dawn a, single piece seat a nei bawk dawn a. He bike tan hian accessory hrang hrang Royal Enfield chuan an rawn tichhuak bawk dawn a ni.
He bike thar tur leh Royal Enfield bike zingah chuan a chi thar deuh tur hi a chanchin pawh kan la hre famkim lo viau a. Tlangzarh ni tura beisei tun thla ni 7-ah hian chiang leh dik lehzualin he bike thar chanchin hi kan hre thei dawn a ni.