Tun hnai mai khan Sainik School Chhingchhip Class X result (CBSE) chuan social media lamah fakselna tam tak hmuh tur a awm a. Vawi khat Board Exam a hmachhawnna niin zirlai zawng zawng pass mai bakah First Division (65%) aia hniam tumah an awm lo. Hetiang result tha a nei thei hi a fakawm hle in ka hria. Social media lama comment-na hrang hrang te han chhiar hian Zoram mipui ten kan hriat chian zawk theih nan tiin, he sikul admission chungchang leh a kaihhnawih thil dang thenkhat han tarlan ve ka duh a ni.
Sainik School Chhingchhip hi 17 May 2017 khan din tan niin class VI atanga hawn tan a ni a. Kum tinin pawl hawn belhin tunah chuan pawl sawm board exam a hmachhawn ve ta a ni. Pawl 12 (Science Stream chauh) thleng hawn chhoh tura ruahhman a ni. Admission chungchang a hriat tur tul tlem han tarlang ila.
- Kum tinin Entrance Exam buatsaih thin niin All India Sainik Schools Entrance Examination chu National Testing Agency-in a huaihawt thin. Aizawl leh Lunglei ah he Entrance hi neih thin a ni. He exam hmachhawn tur chuan, a hma kum October velah Registration tihna turin Advertisement Vanglaini leh Cable TV (Zonet leh LPS) ah te ti chhuah thin a ni.
- Admission hi Class VI leh IX ah chauh hawn thin a ni a, kum bi thliah chu Class VI tan kum 10-12 (01 April 2011 leh 31 March 2013) inkar an ni tur a ni. Tin hei hi mipa leh hmeichhe tan hawn a ni. Class IX tan kum bithliah chu kum 13 – 15 (01 April 2008 to 31March 2010) inkar a ni tur a ni. Tunah hrih chuan Class IX bikah chuan Mipa tan chauha hawn a ni a. Seat a awm theih chuan hmeichhe tan pawh hawn a la ni ang.
- He exam atan inbuatsaih duhte tan Private coaching centre-te pawh hawn a ni a. Nikum lam phei kha chuan Assam Riffles leh MSU te pawhin free coaching centres an buatsaih. Amaherawhchu, Sainik School Chhingchhip hian eng coaching centre mah a recognize/sponsor hran lo tih erawh hriat a tha. Sample questions leh syllabus te chu Sainik schools society website en theih in a awm.
Entrance ah hian tribal tan fail a awm lo va. Medical exam an pal tlang hnuah Sikulin seat a neih ang zelin merit base ah hnawh khah thin a ni.
Scholarship chung chang a hriat tur tlang pui han tar lang ila. Mi rethei zawkte pawh an kal ve theih nan Mizoram Sawrkar chuan scholarship tha tak a pe a thlatin chhungkua sum lak luh milin. Scholarship a pek dan kal hmang chu hetiang hian a hnuaiah tarlan a ni e.
Sr.No Income of Parent per month for ST/SC (Rs.) Income of Parent per month for General (Rs.) Rate of Scholarship
1 Upto Rs. 50,000/- P.M Upto Rs. 25,000/- P.M Full Scholarship (100%)
2 Between Rs. 50,000/- to Rs. 1,00,000/- P.M Between Rs. 25,000/- to Rs. 50,000/- P.M Half Scholarship (50%)
3 Above Rs. 1,00,000/- P.M Above Rs. 50,000/- P.M Not Eligible (0%)
School zirna senso hi kum khat ah chawh rual in Rs 1.5 lakh vel a ni a. Full scholarship hmu chuan Rs 1.2 lakh vel Mizoram Scholarship Board-in a pelet tihna a ni. Half scholarship hmu chuan Rs 65000/- vel an dawng tihna a nih chu. Scholarship hmu lo tan pawh kum khat senso hi private school hostel dahna senso nen tehkhin chuan zirna hautak tak a ni lem lo in a lang. He kum khat senso turah hian uniforms, textbook, pocket money a la tel bawk a ni.
Sainik School din chhan bulpui ber chu Sipai officer (NDA, NA, Technical Entry schemes, AFMC and Others Exam) ni ve theih tura zirlaite tanpui leh buatsaih a ni. Sainik School ah an luh avangin sipai officer an ni ngei ngei ang tih lam a kawk lova, heng sipai officer (Navy, Airforce & Army) ni thei tura Entrance Exam hrang hrangah hian Sainik School-a zirlaite in ziak tling ve thei tura tanpui leh buatsaih hi he sikul tum ber a ni. Zirlaite hi discipline tha, mahni in enkawl thei leh mahni in ringtawk ni tur a buatsaih thin an nih avangin Sipai officer ni duh kher tan lo pawh Zirna In thlanawm tak a ni. Nu leh pa tam zawk hian entrance harsa leh senso sang tak angah ngaiin kan cho loh en nghal ringawt ni hian a hriat theih .
Tun kum hnih kal ta chhung phei chuan kan quota pawh hi kan luah zo mang lo a ni. Hnam dang tan vanneihna a ni mai. Kan Chakma unaute pawhin neih zawng zawng sengin an lo bei thin a, tunah pawh hian zirlai kan nei nual tawh a ni. He sikul hi Mizoram Sawrkarin harsa tak chung leh sum tam tak sengin Ministry of Defence nen MoU ziaka din a ni a. Nang leh kei hian kan chhawr tangkai loh chuan hnam dangte vanneihna kawng a in hawng a ni mai. Bihar, UP, MP leh Kerala, AP, Assam etc atangin rethei ve tak tak te pawhin an fate scholarship pawh hmu lovin an rawn dah tawk tawk a ni a, keini chuan bel chhunga sa awm sa pawh kan ban peih meuh lo chu niin a lang.
A tawp berah chuan, he sikul hi kum nga chauh upa a ni a duhkhawp loh leh that tawk lohna tam tak a nei. Theih tawp chhuah zel ila. School Infrastructure lamah phei chuan training facilities ah a la pa chhe hle. Football ground, indoor stadium, Horse riding, swimming pool, athletic track, parade ground, indoor shooting range changkang leh thate (state of art) a mamawh hle. Heng facility-te hi Sainik school dangte chuan an nei deuh vek tawh. MoU ziah a ni lai khan Ministry of Defence chuan he mawhphurhna hi Mizoram Sawrkar kutah a dah a ni.
Sainik School dang zirlai te er leh hmachhawn ve tur hian heng facility-te hi Mizoram Sawrkar hian ngaihtuah rang thei se, a va lawmawm dawn em! Sainik School Chhingchhip ZOFATE tan MALSAWMNA lo ni mawlh rawh se.
- TPA, SS Chhingchhip