Aizawl: MZP-in Cooperation deptt-a Addl. RCS pension tawh, Lalrinsanga sorkarin a ruai nawn leh chu duh lovin nimin khan a pisa kai tur dang turin an kalkhawm a, ni thum chhung chawlh a lo lak avangin an tin darh leh a. Lalrinsanga rawih nawnna thupek chu tun thla ni 4 hma ngeia sut an phut.
Pension tawh rawih nawn duh lova an hmalaknaah an thil phutte a hlawhtling lo a nih chuan MZP chuan tun thla ni 5-ah Cooperative Societies Registrar pisa kai tur dan leh an tum bakah ni 8-ah cooperation minister pisa kai tur dan leh kawngzawh an tum bawk.
Tar lan tawh angin MZP hian sorkarin Cooperation department-a Addl. RCS pension tawh a ruai nawn leh chu duh lovin, rawih nawn leh a nihna order an hal tawh a, he order hi sut phutin kawng hrang hrangin hma an la mek a ni.
Nimina MZP hruaitute leh Aizawl khawpui chhung college hrang hrang SU-te thukhawm chuan zirlaite leh thalai hna zawng mekte tana theihtawp chhuaha hmalak zui zel an rel a. “Vawi tam tak pension tawh ruai nawn lo tura kan ngenna ngai pawimawh lova hmalatu Cooperation Minister C. Lalrinsanga leh he department-a rawih nawn mek, Lalrinsanga, Addl. RCS (Rtd) te hi kan dem takzet a ni,” tiin, tun thla ni 4 ral hma ngeia pension rawih nawn a nihna thupek sut an phut bawk.