Sorkar laipuiin Jammu & Kashmir state hung bikna, ram danpuia Article 370 hlipa union territory pahniha a then nghal champha kum thumna, Zirtawpni khan chief minister hlui, PDP president ni bawk, Mehbooba Mufti chuan sorkar thiltih dan duh lohna lantirna, Srinagar-a neihah a kaihruai.
An party hruaitu leh worker eng emaw zatin an tawiawm a, Mufti-i ho hian Residency road-ah August 5, 2019-a sorkar thutlukna siam duh lohna an aupui.
Pung khawmte hian sorkar chet dan duh lohna bakah hian Kashmir mipuite thihna thleng thin tihtawpa Article 370 hlih a nih avanga mante chhuah tura tihna an aupui bawk.
PDP hruaitute leh an mite chuan BJP kaihhruai sorkarin August 5, 2019-a thutlukna an siam chu an pawm ngai dawn lo tih sawiin, hetiang thutlukna an siam leh hemi nia dan an siam thar chu ‘black law’ tiin an sawi.
“Eng thu leh eng milem mahin kum hnih liam taa J&K-in hun thim a tawn avanga kan na, kan hrehawmna leh kan tawrhna kha a hrilh fiah zo lo,” tiin Twitter-ah Mufti-i chuan a tar lang.
Hetih lai hian J&K-a party tin aiawhte telna, Peoples Alliance for Gupkar Declaration (PAGD) chu Farooq Abdullah-a chenna inah an thukhawm bawk.
Article 370 hlih leh UT pahniha Jammu & Kashmir then a nih champha thlen hma ni, Nilaini khan PAGD hian BJP-in Naya Kashmir thupui hmanga an chunga an chet dan chu fiamthu mai a nih thu leh August 5, 2019-a thutlukna an siam phenah chuan eng nge awm chiah hriat an duh thu an sawi bawk.